Անգլիացի հանրահայտ ռոք երաժիշտ, արտիստ, պրոդյուսեր, «The Rolling Stones» խմբի մենակատար Միք Ջագերն այս օրերին ստանում է հոբելյանական բազմաթիվ շնորհավորանքներ: 70-ամյա ռոքընդռոլի աստղի էնտուզիազմն ու էներգիան անսպառ են եւ ժամանակն ու տարիքը կարծես խնայում են նրան: Կյանքի մեծ ճանապարհՙ երկու կին, բազմաթիվ երեխաներ, ասպետական կոչում, թագուհու բարեմաղթանքներ, փառք ու մեծարանք, միլիոնավոր վաճառված ալբոմներ, սակայն միեւնույն է, բեմը ձգում է արտիստին. դա իր տարերքն է, նա շարունակում է բեմ դուրս գալ մինչեւ այսօր. «Ինձ ուղղակի դուր է գալիս այն, ինչ ես անում եմ: Արտիստի բեմական տեւականության համար առանձնահատուկ ուրիշ գաղտնիք չկա: Պրոֆեսիոնալ քննադատներին գրեթե ուշադրություն չեմ դարձնում, որովհետեւ աշխատում եմ հանդիսատեսի համար, ոչ թեՙ նրանց կամ ժուռնալիստների: Տարիքային առումով հնարավոր է հանդիմանեն ինձ, թե ես անցնող կերպար եմ, արտիստի անցնող խառնվածք, սակայն ի հեճուկս այդպես մտածողների, ես դեռ այստեղ եմ, ուզում եմ աշխատել, երաժշտություն գրել, համերգներ ունենալ»:
Լոնդոնի տնտեսական եւ քաղաքական գիտությունների դպրոցը, որտեղ նա սովորում էր ամենավաղ տարիներին, կարելի է ասել բոլորովին չի հետաքրքրել Միք Ջագերին, ուսումը կիսատ է թողել : Այդ տարիներին միակ տեղը, որ հաճույքով էր հաճախում, երաժշտության դասերն էին:
Խումբը, որի առաջատար մենակատարն է նա երկար տարիներՙ «The Rolling Stones»-ը այդպես անվանակոչվեց 1962-ին եւ նույն թվականին էլ առաջին ելույթն ունեցավ լոնդոնյան «Marquee» ակումբում: Միք Ջագերի բեմական կերպարն ընկալվել է որպես խիստ առանձնահատուկ արտիստիկ ձեռագրով օժտված երգչի, որի ձայնիՙ երբեմն խոր, երբեմն կանացի-փափուկ երանգները, գայթակղիչ, ցանկասեր ժպիտը, բեմական էքսցենտրիզմըՙ շարժումների, տաք-ագրեսիվությունը նրան բերել են ամենաառաջատար ռոք աստղի անուն: Երաժշտական ասպարեզում Միք Ջագերի ծառայությունները բարձր են գնահատվել, 60-ականներին Ելիզավետա II թագուհին շնորհել է նրան Ասպետի կոչում:
Իր հարցազրույցներից մեկում երգիչը համեմատելով 1968-98-ականները, ասել է, որ եթե նախկինում սեքսի, նարկոտիկի եւ ռոքընդռոլի եռյակում սեքսն առաջին տեղն էր զբաղեցնում, հիմա դրան փոխարինել է նարկոտիկը: Տարիներ անց նա հայտարարել է, որ թողել է խմելը, ծխելը եւ նարկոտիկ ընդունելը: Պատճառն, իհարկե, նախ եւ առաջ առողջությունն է: «Ինձ համար թանկ է անվանս պատիվը,- ասել է նա, չեմ ուզում վերածվել ծեր ավերակի: Չէ՞ որ մենք դեռ աստղ ենք եւ մեզ համարում են կենդանի լեգենդ»:
2010-ին Միք Ջագերը հիմնեց իր նոր` «Super Heavy» խումբը:
