ՄԵԴԱԼՆԵՐԻ ՀԱՄԱՐ ՊԱՅՔԱՐԸ ԹԵԺ ԲՆՈՒՅԹ Է ԿՐՈՒՄ

Բելգրադում ընթացող շախմատի Եվրոպայի կանանց անհատական առաջնությունում պայքարը խաղարկվող մեդալների համար գնալով ավելի թեժ բնույթ է կրում: Յուրաքանչյուր կես միավորի կորուստ այդ պայքարում կարող է ճակատագրական լինել: Ուստի շախմատիստուհիները ձգտում են անսխալ գործել: Մրցաշարի 7-րդ տուրում հայ շախմատիստուհիներից լավագույն արդյունքն ունեցող Լիլիթ Մկրտչյանը սեւերով հաշտություն կնքեց ռուսաստանցի գրոսմայստեր Դարիա Չարոչկինայի հետ: Լիլիթը վաստակած 5 միավորով ընթանում է 17-րդ տեղում: Մեդալներին հավակնելու համար հայ շախմատիստուհին պետք է ձգտի վերջնագծում հաղթանակներ տոնել, ինչն այդքան էլ հեշտ խնդիր չէ:

Առայժմ Լիլիթը մեկ միավոր է զիջում աղյուսակը գլխավորող ռուսաստանցի Վալենտինա Գունինային եւ Հունգարիան ներկայացնող Հոանգ Տխան Չանգին: Գունինան հաղթեց Նինո Խուրցիձեին, Չանգը պարտության մատնեց Դեյմանտե Դաուլիտեին: 7 շախմատիստուհիներ 5,5-ական միավորով հետապնդում են առաջատարներին:

4-ական միավոր են վաստակել Աննա Հայրապետյանն ու Լիլիթ Գալոյանը: Աննան հաղթեց Ջովանա Վոյնովիչին, իսկ Լիլիթը ոչ-ոքի խաղաց Անաստասիա Բոդնարուկի հետ: Հաջող մեկնարկից հետո իր դիրքերը զգալիորեն զիջեց Մարիա Կուրսովան, որը մրցաշարում 2-րդ պարտությունը կրեց: Նրա մրցակցուհին Ելիզավետա Բրոննիկովան էր: Մարիան 3,5 միավորով 80-րդ տեղում է: Իսկ ահա ռուսաստանցի Ալինա Բալայանն անհաջող մեկնարկից հետո աստիճանաբար բարելավում է դիրքերը: Նա հաղթեց Այնա Եգորովային ու 4 միավորով տեղափոխվեց 72-րդ հորիզոնական:

Նկար 1. Լիլիթ Գալոյան