Մարդու իրավունքների պաշտպանի (ՄԻՊ) աշխատակազմը հանդես է եկել հայտարարությամբ, որտեղ ՄԻՊ Կարեն Անդրեասյանի անունից ասվում է, որ առողջապահության նախարարության թողտվության պայմաններում ծնողներից հավելյալ վճարումներ են գանձվում:
Կարեն Անդրեասյանը դեռեւս իր նախորդ տարեկան զեկույցում անդրադարձել էր Երեխայի առողջության պետական հավաստագրի ծրագրի բացթողումներին: Համաձայն ծրագրիՙ մինչեւ 7 տարեկան երեխաների բուժօգնությունն անվճար է, սակայն ծնողներն անվճար բուժօգնության համար անհրաժեշտ փաստաթուղթն ունենալով հանդերձ` հաճախ ստիպված են լինում հավելյալ վճարումներ կատարել առանձին բժիշկների:
Խնդրի բարձրաձայնումից անցել է շուրջ մեկ տարի, սակայն դրական առաջընթաց չի գրանցվել: Ավելին` ՄԻՊ աշխատակազմը շարունակում է դիմում-բողոքներ ստանալ նմանատիպ խախտումների վերաբերյալ: Օրինակ` Գյումրու մոր եւ մանկան ավստրիական հիվանդանոցի դեմ ուղղված բողոքների մասին օմբուդսմենը պաշտոնապես տեղեկացրել է առողջապահության նախարարին, սակայն որեւէ հստակ պատասխան չի ստացել, թե արդյոք իրավախախտները ենթարկվե՞լ են պատասխանատվության:
