Հայաստանի ազգային հավաքականի եւ Կրասնոդարի «Կուբանի» 23-ամյա կիսապաշտպան Արաս Օզբիլիսի համար ՌԴ առաջնությունը հաջող սկսվեց: Կազանի «Ռուբինի» հետ մեկնարկային խաղում Արասը տուգանային հարվածով գեղեցիկ գոլի հեղինակ դարձավՙ փրկելով «Կուբանին» պարտությունից: Ներկայացնում ենք Օզբիլիսի հարցազրույցը ռուսական «Իզվեստիայի» թղթակցի հետ:
– Նախ շնորհավորում եմ «Ռուբինի» դարպասը խփած անհավանական գոլի առթիվ: Հաճա՞խ ես նման գեղեցիկ ու կարեւոր գոլեր խփել:
– Շնորհակալություն: Գուցե կարեւորության առումով այդ գոլը քչերից մեկն էր: Իսկ գեղեցիկ գոլեր շատ եմ խփել:
– Ինչպիսի՞ն է տրամադրությունդ մեկնարկային խաղից հետո:
– Մարտական: Հաշվի առնելով, որ «Ռուբինը» դեռեւս 1-ին խաղակեսում 10 հոգով էր մնացել, մենք մեծ ուժերով առաջ նետվեցինք: Սակայն մրցակիցը դիմագրավեց մեր գրոհներին եւ նույնիսկ բացեց հաշիվը: Ուրախ եմ, որ ինձ հաջողվեց գոլ խփել ու վերականգնել հավասարակշռությունը: Գուցե մենք ավելիին էինք արժանի: Սակայն մյուս կողմից «Կուբանի» դարպասապահ Բելենովը հիանալի խաղ ցուցադրեց եւ մի քանի անգամ փրկեց թիմին: Ընդհանուր առմամբ հանդիպման արդյունքը կարելի է օրինաչափ համարել:
– Այս տարի «Կուբանն» առաջին անգամ մասնակցելու է եվրոգավաթների մրցաշարին: Անհամբերությա՞մբ ես սպասում մեկնարկին:
– Իհարկե: Մեզ շատ դժվարին մրցաշար է սպասում: Անցած մրցաշրջանում թիմը գերազանց արդյունքի հասավ, ուստի պետք է հաստատենք մեր կարգը: Մենք հուսալի խաղ ցուցադրեցինք ողջ մրցաշրջանում, ընդ որում բոլոր մարզիչների օրոք: «Կուբանում» հիանալի կոլեկտիվ է ձեւավորվել, ունենք նոր մարզիչ, որի գլխավորությամբ եւս քրտնաջան մարզվում ենք:
– «Կուբանը» կարո՞ղ է Եվրոպայի լիգայի խմբային մրցաշարի ուղեգիր նվաճել:
– Դա հեշտ խնդիր չի լինի, քանի որ որակավորման 3-րդ փուլից հետո մեզ լուրջ մրցակից բաժին կհասնի: Սակայն նախ պետք է հաղթահարել առաջին արգելքը:
– Ի՞նչ խնդիրներ ես դրել քո առջեւ նոր մրցաշրջանում:
– Կցանկանայի հնարավորինս շատ գոլեր խփել, որպեսզի «Կուբանը» մշտապես հաղթի: Ճիշտ է, ինձ համար գոլ խփելն առանձնակի նշանակություն չունի: Կարեւորը, որ «Կուբանն» անհրաժեշտ միավորները վաստակի: Մեր խնդիրն է նախորդ մրցաշրջանից վատ հանդես չգալ: Սակայն հնարավոր է, որ նաեւ գերազանցենք անցած տարվա ցուցանիշը:
– Մեկ մրցաշրջանի ընթացքում «Կուբանում» 4 մարզիչ փոխվեց: Ո՞րն է մարզչական հերթափոխի պատճառը:
– Տվյալ դեպքում ցուցանիշը պետք է լինի թիմի արդյունքը: Հետաքրքրական է, որ յուրաքանչյուր մարզչի օրոք թիմն առաջադիմել է եւ արդյունքում Եվրոպայի լիգայի ուղեգիր է նվաճել: Եթե ամեն ինչ վատ լիներ, ապա կարելի էր ասել, որ մարզիչների հաճախակի փոփոխությունը հիմնախնդիր է:
– Առջեւում «Կուբանին» դժվարին մրցախաղեր են սպասում «Զենիթի», «Սպարտակի» եւ ԲԿՄԱ-ի հետ: Որքա՞ն միավոր եք նախատեսում վաստակել այդ հանդիպումներում:
– Մենք լրջորեն ենք նախապատրաստվում այդ խաղերին: Նախորդ տարիների փորձը ցույց է տվել, որ մենք կարող ենք հավասար պայքար մղել ուժեղ ակումբների դեմ: Նախորդ մրցաշրջանում առաջատարների հետ հանդիպումների մեծամասնությունն ավարտել ենք ոչ-ոքի: Այս տարի կփորձենք մեր լավագույն խաղը ցուցադրել եւ հաղթել յուրաքանչյուր մրցակցի:
– Շատ է խոսվում, որ դու հավանաբար կհեռանաս «Կուբանից»: Տրանսֆերային պատուհանի փակմանը 1,5 ամիս է մնացել:
– Ֆուտբոլում երբեք չպետք է բացառել ոչինչ, ամեն ինչ հնարավոր է: Ինձ դուր են գալիս «Կուբանն» ու թիմի երկրպագուները: Անում եմ ամեն ինչ ուժերիս ներածի չափով: Եկեք չզբաղվենք գուշակությամբ: Կապրենքՙ կտեսնենք:
– «Կուբան» է տեղափոխվել հանրահայտ Ջիբրիլ Սիսեն: Նա իրո՞ք կուժեղացնի թիմի կազմը: Կարծիք կա, որ նա եկել է Ռուսաստան գումար վաստակելու:
– Չեմ կարծում, թե նա միայն դրա համար է եկել: Զգացվում է, որ նա գոլեր խփելու եւ հաղթանակներ տանելու կարոտ է: Ինձ թվում է, որ Սիսեն մեծ օգուտ կբերի թիմին, կուժեղացնի կազմը: Նա հսկայական փորձ ունի, հանդես է եկել մի շարք անվանի ակումբներում: Հաճելի է նման բարձրակարգ ֆուտբոլիստին «Կուբանի» մարզաշապիկով տեսնելը:
– Ի՞նչ է կատարվում Հայաստանի ազգային հավաքականի հետ, որը նախ սեփական հարկի տակ պարտվում է Մալթային, ապա հյուրընկալվելիս ջախջախում է Դանիային: Դեռեւս հնարավո՞ր է խմբում իրավիճակը փոփոխել եւ աշխարհի առաջնության ուղեգիր նվաճել:
– Դա հենց հաստատում է իմ այն խոսքերը, որ ֆուտբոլում ամեն ինչ հնարավոր է: Այսօր դու հաղթում ես, բայց վաղը հնարավոր է, որ պարտվես: Ինչ խոսք, ՀՀ հավաքականին դեռեւս չի բավականացնում կայունությունը, սակայն մենք այդ ուղղությամբ աշխատում ենք: Վերջին արդյունքը մեզ դրական զգացողություններ հաղորդեց: Հուսով եմ, որ մեզ կհաջողվի զարգացնել հաջողությունն ու պայքարել աշխարհի առաջնության ուղեգրի համար:
