Ազատամարտիկները օրենքների շրջանակներում կպայքարեն իրենց իրավունքների համար: Այսպիսի տեսակետ հայտնեցին Ազատության հրապարակում հավաքված իրենց կենսական պայմանների համար բարելավում պահանջող ազատամարտիկները: «20 տարի լռել ենք, բայց եկել է պահը, որ ներկայացնենք մեր պահանջներն ու ստանանք արդար լուծում»,- ասաց ազատամարտիկ Կարեն Մելիքսեթյանը:
Արդեն 6 օր հացադուլ անող Խաչիկ Ավետիսյանը բոլոր ազատամարտիկներին ու մյուս բոլոր հայ քաղաքացիներին կոչ արեց համախմբվել ու պայքարել: «Ես կշարունակեմ իմ հացադուլը մինչեւ հուլիսի 28-ը, եթե այդ օրը Ազատության հրապարակում չհավաքվի 10.000 մարդ, ես կշարունակեմ իր հացադուլը մինչեւ օգոստոսի 8-ը, եթե այդ ժամանակ էլ չկատարվեն իմ եւ իմ զինակից ընկերների պահանջները, ես կշարունակեմ իմ հացադուլը 5-ական օրերով»,- ասաց նա: Խաչիկ Ավետիսյանը հավատում է, որ իր պայքարն արդյունք է տալու:
Այսօրվանից հացադուլ կիրականացնեն նաեւ մի քանի այլ ազատամարտիկներ:
Ազատամարտիկները նաեւ հանդես են եկել հայտարարությամբ, որով խստորեն դատապարտել են ազատամարտիկ Հրաչյա Հարությունյանին նվաստացուցիչ հանգամանքներում դատարան բերման ենթարկելու փաստը:
Մոտ երկու ամիս շարունակվող ակցիաների ընթացքում ազատամարտիկներին երկու անգամ ընդունել է գործադիր մարմնի ղեկավար Տիգրան Սարգսյանը: Հուլիսի 17-ին կայացած հանդիպման ընթացքում նա նշել է, որ որոշակի աշխատանք է կատարվել ըստ գերատեսչությունների, մասնավորապես ազատամարտիկներին հուզող խնդիրների լուծման վերաբերյալ առաջարկություններ են ներկայացրել ՀՀ կառավարության աշխատակազմի ղեկավար Վաչե Գաբրիելյանը, ՀՀ աշխատանքի եւ սոցիալական հարցերի նախարար Արտեմ Ասատրյանը, ՀՀ մշակույթի նախարար Հասմիկ Պողոսյանը, ՀՀ պաշտպանության նախարարի տեղակալ Արա Նազարյանը, ՀՀ կրթության եւ գիտության նախարարի տեղակալ Կարինե Հարությունյանը, ՀՀ ոստիկանապետի տեղակալ Հովհաննես Հունանյանը: Քննարկվել են ազատամարտիկների կարգավիճակի եւ ցուցակների ճշգրտմանը, կարգավիճակին համապատասխան ծրագրերի իրականացմանը (բնակարանային ապահովում, բուժօգնություն, կրթություն, կոմունալ ծախսեր, կենսաթոշակներ եւ նպաստներ), հայրենասիրական դաստիարակությանը, ազատամարտի վերաբերյալ թանգարանային գործունեությանը եւ այլ խնդիրներին վերաբերող հարցեր:
Քննարկման արդյունքում պայմանավորվածություն է ձեռք բերվել, որ համատեղ աշխատանքային խմբերի շրջանակում ազատամարտիկները կհամագործակցեն պատասխանատու պետական մարմինների հետ` բարձրացված խնդիրները բազմակողմանի քննարկելու եւ լուծման ընդունելի տարբերակներ մշակելու նպատակով:
