Բաքվում ասել է Թուրքիայի արտգործնախարարըՙ արձագանքելով ՀՀ գլխավոր դատախազին
«Ազգի» երեկվա համարում ՀՀ գլխավոր դատախազ Աղվան Հովսեփյանի հայտարարության թուրքական արձագանքներին անդրադառնալիս նշել էինք, որ հունիսի 16-ին երկօրյա պաշտոնական այցով Ադրբեջան մեկնած Թուրքիայի արտգործնախարար Ահմեդ Դավութօղլուին Բաքվի օդանավակայանում դիմավորել է միայն թուրք դեսպան Ալփեր Ջոշքունը, ուղեկցելով նրան հյուրանոց: Այսինքնՙ Ադրբեջանի արտգործնախարարության որեւէ աշխատակից այդ պահին ներկա չի եղել Հեյդար Ալիեւի անվան օդանավակայանում, որ դիմավորի «ավագ եղբոր» արտգործնախարարին, էլ չենք խոսում Էլմար Մամեդյարովի մասին:
Թեեւ այս անտարբերությունը չի խանգարել Թուրքիայի արտգործնախարարին, որ Բաքվում 20 տարվա «անգործության» համար դատապարտի ԵԱՀԿ Մինսկի խմբին կամ միջազգային հանրության առջեւ վերստին բարձրացնի ադրբեջանական օկուպացված տարածքների ծամծմված հարցը, որն իբր Ադրբեջանի մակերեսի 20 տոկոսն է կազմում, այսինքնՙ անվերապահորեն սատարի հայ սպանելու համար մարդասպան ստահակին ազգային հերոս հռչակած ադրբեջանցի հրոսակին, սակայն «Ազգ»-ի վերլուծաբան Վահրամ Աթանեսյանը երեկ մանրամասն անդրադարձել էր Դավութօղլուի Բաքվում անցկացրած հանդիպումներին:
Նախորդ օրը CNN-Turk-ն էլ անդրադարձել է Թուրքիայի արտգործնախարարի Ադրբեջան այցելությանը: Այն տարբերությամբ, որ թուրքական հեռուստատեսությունը, մի կողմ թողած Դավութօղլուի հանդիպումները, կայքէջում ներկայացրել է ՀՀ գլխավոր դատախազի հայտարարություններին նրա արձագանքը:
Ըստ CNN-Turk-իՙ Դավութօղլուն հայտարարությունների առնչությամբ Բաքվում ասել է. «Ես չափն իմանալու կոչ եմ անում բոլոր նրանց, ովքեր փորձում են թեկուզ մեկ խճաքար պոկել Թուրքիայի տարածքից: Առաջարկելը դեռ մի կողմ, ոչ ոք այդ բանը չի կարող նույնիսկ մտքով անցկացնել»:
Այնուհետեւ Դավութօղլուն զառանցանք է համարել հողային պահանջը եւ ընդգծել է, որ բոլորը չափ ու սահման պետք է իմանան, որպեսզի հնարավոր լինի խաղաղություն հաստատել Հարավային Կովկասում: Ապա նա ավելացրել է. «Մեզանից հող պահանջելը չափը չիմանալ է: Ես բանականության կոչ եմ անում բոլորին: Մեզ համար սկզբունք է ե՛ւ Թուրքիայի, ե՛ւ Ադրբեջանի տարածքայինի ամբողջականությունը»:
