Հենրիխ Մխիթարյանն առաջին մարզումն է անցկացրել Դորտմունդի «Բորուսիայի» կազմում, որից հետո տպավորություններն է հայտնել ակումբի պաշտոնական ալիքին:
«Սա շատ կարեւոր եւ առաջընթաց քայլ է ֆուտբոլային իմ կարիերայում: «Բորուսիան» ընտրեցի, քանի որ այն բարձրակարգ ակումբ է, որը շատ լավ ֆուտբոլիստներ ու մարզիչ ունի: Երբեք նման զգացողություններ չէի ունեցել, ինչպիսին ունեցա Դորտմունդում «Շախտյորի» կազմում խաղալիս: Մարզադաշտում ականատես եղա ֆուտբոլային հրաշալի մթնոլորտի: «Բորուսիայի» երկրպագուները հիանալի են աջակցում իրենց թիմին ու ֆանտաստիկ մթնոլորտ են ստեղծում: Հուսով եմ, որ ես էլ կզգամ նրանց աջակցությունը: Իմ նպատակը «Բորուսիայի» կազմում յուրաքանչյուր խաղում հաղթելն է», նշել է Հենրիխ Մխիթարյանը:
Ֆուտբոլային գործակալ Դմիտրի Սելյուկի համոզմամբ, Մխիթարյանի տրանսֆերը «Շախտյորին» համաշխարհային համբավ բերեց. «3 տարի առաջ անմիջականորեն մասնակցել եմ Մխիթարյանի տեղափոխությանը Դոնեցկի «Շախտյոր»: Գոհ եմ, որ նա խաղաց «Շախտյորում» եւ թիմին հաղթանակներ պարգեւեց: «Շախտյորն» էլ Հենրիխին բարձրակարգ ֆուտբոլիստ դարձրեց: Այնպես որ «Բորուսիա» տեղափոխվելը ձեռնտու էր բոլորին: Այն մեծ համբավ բերեց «Շախտյորին», որը շատ արդար գործընկեր է: Օլեգ Մկրտչյանը Մխիթարյանի տրանսֆերից 13 մլն 750 հազար եվրո է ստացել»:
