Հայկական ակումբային ֆուտբոլում հերթական խայտառակությունը գրանցվեց: Բավական չէր, որ «Միկան» չկարողացավ հաղթահարել «Ռուդարի» արգելքը, Հայաստանի չեմպիոն «Շիրակն» էլ խայտառակ պարտություն կրեց Սան Մարինոն ներկայացնող սիրողական «Տրե Պենեից»: Սակայն հարցը միայն 0-1 հաշվով հյուրընկալվելիս կրած ամոթալի պարտությունը չէ, այլ այն անկազմակերպ ու անփույթ խաղը, որ ցուցադրեց Հայաստանի չեմպիոնը սիրողական թիմի դեմ: Հանդիպման ելքը վճռած միակ գոլն էլ անմեղ իրադրությունում արդեն 2-րդ րոպեին սեփական դարպասը խփեցին շիրակցիները: «Շիրակի» դարպասին ոչինչ չէր սպառնում, պաշտպան Կյերեն գնդակը փոխանցեց դարպասապահին, որն արդեն դուրս էր եկել իր տեղից ու այն հայտնվեց դարպասում: Մնացած 88 րոպեները բավական չեղան, որպեսզի շիրակցիները գոնե հավասարեցնեին հաշիվը: Երբեմն թվում էր, թե «Շիրակն» է սիրողական թիմ, որի գործողություններում մեծ տոկոս էր կազմում տեխնիկական խոտանը: Ողջ խաղի ընթացքում շիրակցիներն ընդամենը մի քանի վտանգավոր պահ ստեղծեցին մրցակցի դարպասին, սակայն չկարողացան հաջողության հասնել:
Ինչպես հայտնի է, Գյումրիում «Շիրակը» հաղթել էր 3-0 հաշվով եւ գործնականում ապահովել էր հաջորդ փուլի ուղեգիրը: Այն ժամանակ էլ «Շիրակի» խաղը չգոհացրեց թե՛ ֆուտբոլասերներին, թե՛ թիմի գլխավոր մարզիչ Վարդան Բիչախչյանին, որը խիստ դժգոհ էր մնացել: Իսկ շիրակցիները խոստացել էին պատասխան խաղում ավելի հաջող խաղալ: Թե ինչպես նրանք կատարեցին իրենց խոստումը, բոլորիս է պարզ:
Ահա թե ինչպիսի կարծիք են հայտնել թիմերի մարզիչները խաղից հետո:
Վարդան Բիչախչյան («Շիրակ») – Խաղի մասին խոսելու շատ բան չկա: Շատ վատ է, որ պարտվեցինք, չկարողացանք ճիշտ հետեւություններ անել առաջին խաղից հետո: Խաղի ընթացքի վրա ազդեց խաղասկզբում անսպասելի գոլը, որի պատճառը ֆուտբոլիստների անհամաձայնեցված գործողություններն էին: Գոլից հետո տղաների մոտ շտապողականություն նկատվեց: Ճիշտ է, շատ գոլային պահեր ստեղծել չհաջողվեց, բայց եղածն էլ չիրացրինք: Ֆուտբոլիստները սառնասիրտ չգտնվեցին, խոտանը շատ էր: Վատ է, որ խախտվեց խաղային կարգապահությունը, ֆուտբոլիստները քարտեր ստացան, իսկ Դավիթ Մարիկյանը հեռացվեց դաշտից: Պարտավոր էինք հաղթել, բայց չկարողացանք: Մեծ ուժերով պաշտպանվող թիմի դեմ հնարավոր չէ արդյունքի հասնել, եթե սառնասիրտ չես գործում, ճշգրիտ փոխանցումներ չես կատարում:
Սերբիայի «Պարտիզանի» հետ խաղին ընդամենը մեկ շաբաթ է մնացել: Կփորձենք ամեն ինչ անել, որպեսզի լավ հանդես գանք: Եթե նման կերպ խաղանք ու տրամադրվենք, ապա հաստատ շատ ավելի ցավալի արդյունք կգրանցվի: Պետք է հնարավորինս կազմակերպված ֆուտբոլ խաղանք:
Մարկո Պրոտի («Տրե Պենե») – Սա ֆանտաստիկ արդյունք է: Սան Մարինոյի ներկայացուցիչը երբեք չէր հաղթել եվրոգավաթներում: Այնպես որ այս հաղթանակը պատմական է: Մեր թիմի խաղացողներն ահռելի աշխատանք կատարեցին: Թիմերի միջեւ խաղամակարդակների մեծ տարբերություն կար: «Շիրակն» ավելի բարձրակարգ թիմ է, ինչի մասին դեռեւս առաջին խաղից հետո էի ասել: Մեր ֆուտբոլիստներից մեծ ջանքեր պահանջվեցինՙ հաղթական հաշիվը պահելու համար: «Տրե Պենեն» ոչինչ չխնայեց իր երկրպագուներին տոն պարգեւելու համար:
Ֆուտբոլասերներին տեղեկացնենք, որ մինչեւ «Շիրակի» հետ պատասխան խաղը եվրոգավաթներում Սան Մարինոյի թիմերը 47 հանդիպումներից 43-ում պարտվել էին եւ միայն 4 խաղ էին ավարտել ոչ-ոքի, խփել էին ընդամենը 13 գնդակ, բաց թողել 155 գոլ:
Հերթական խայտառակ պարտություն խոսում է հայկական ֆուտբոլում տիրող անմխիթար վիճակի, ֆուտբոլիստների ցածր խաղամակարդակի եւ ոչ պրոֆեսիոնալ մոտեցման մասին: Դեռեւս նախորդ տարի Կապանի «Գանձասարը» Եվրոպայի լիգայի մրցաշարում 1-3 հաշվով պարտվեց Ֆարերների «Ստրեյմուրին»: Այս տարի Հայաստանի ազգային հավաքականը ոչ-ոքի խաղաց Լյուքսեմբուրգի ընտրանու հետ ու խայտառակ պարտություն կրեց Մալթայից: Այդ տխուր շարքը շարունակեց «Շիրակը», որին հուլիսի 16-ին հարկ կլինի չեմպիոնների լիգայի որակավորման 2-րդ փուլում մրցելու «Պարտիզանի» հետ: Անկեղծ ասած, այդ մրցակցության ելքը մտահոգության տեղիք է տալիս:
Իհարկե, բոլորս ուրախացանք եւ հպարտության զգացում ապրեցինք Հենրիխ Մխիթարյանի տրանսֆերի կայացման առիթով: Սակայն ինչպես ասում ենՙ մեկ ծաղկով գարուն չի գա: Հայկական ակումբային ֆուտբոլը տարեցտարի զիջում է իր դիրքերը: Արդեն հայտնվել ենք ՈՒԵՖԱ-ի գործակիցների աղյուսակի վերջին հորիզոնականներում: Թիմերի մի մասը հայտնվել է ֆինանսական ծանր կացության մեջ, նույն պատճառով վերջերս լուծարվեց Դիլիջանի «Իմպուլսը»: Հայաստանում ընդամենը 8 թիմ կա, որոնցից ոմանց ճակատագիրը նոր մեկնարկող առաջնությունում մշուշոտ է: Սա է այսօր հայկական ֆուտբոլի տխուր իրականությունը, որի դառը պտուղները «վայելում» ենք:
