Ռուս կինոռեժիսոր Բորիս Խլեբնիկովի «Երկար, երջանիկ կյանք» գեղարվեստական ֆիլմի ցուցադրությամբ Գյումրու «Հոկտեմբեր» կինոթատրոնում, «Ոսկե ծիրան» տասներորդ միջազգային կինոփառատոնի շրջանակներում հուլիսի 9-ից մեկնարկել է «ԱՊՀ երկրների կինոն` ԱՊՀ մշակութային մայրաքաղաք Գյումրիում» հնգօրյա ծրագիրը: Այստեղ դրա անցկացմանն աջակցել են ԱՊՀ երկրների միջպետական համագործակցության հիմնադրամը, Շիրակի մարզպետարանն ու Գյումրու քաղաքապետարանը: Ծրագրի բացմանը ներկա են եղել ԱՊՀ երկրների երիտասարդ կինոբեմադրիչներ:
Հինգ օրերի ընթացքում այստեղ ընդհանուր առմամբ ցուցադրվելու է մեկուկես տասնյակ կինոնկար, իսկ ծրագիրը եզրափակվելու է «Միմինո» հանրահայտ ֆիլմով: Դրվատելի է նաեւ, որ այս կինոնկարների դիտման համար գյումրեցի հանդիսատեսի մուտքը «Հոկտեմբեր» կինոթատրոնի դահլիճ անվճար է:
«Այն, որ Գյումրին մշակույթի եւ արվեստի քաղաք է, հայտնի է ամբողջ աշխարհին,- նշվում է ծրագրի առիթով Գյումրու քաղաքապետի հղած ուղերձում:- Մեր քաղաքն ամբողջ աշխարհին տվել է կինոյի աշխարհահռչակ դերասաններ եւ ռեժիսորներ, մեր քաղաքում են ծնվել սովետական տարիներին հասարակության կողմից սիրված եւ դասական դարձած շատ ֆիլմեր: Ես վստահ եմ, որ այս ծրագիրը եւս լուրջ խթան կհանդիսանան մեր քաղաքում կինոարտադրության բարի ավանդույթները վերականգնելու համար»:
