Գյումրու թատերական կյանքում նոր նշանակալից իրադարձություն դարձավ «Դուետ» միջազգային փառատոնը, որն այստեղ անցկացվեց հուլիսի 1-ից 8-ը, «Գյումրին ԱՊՀ 2013 թ. մշակութային մայրաքաղաք» ծրագրի շրջանակներում: Երկու դերասանով ներկայացումներով քաղաքի Վարդան Աճեմյանի անվան պետական դրամատիկական թատրոնի եւ Արվեստների ակադեմիայի բեմերում հանդես եկան Հայաստանի, Ռուսաստանի, Վրաստանի, Ֆրանսիայի 18 թատերախմբեր, ավելի քան մեկշաբաթյա մշակութային տոն պարգեւելով գյումրեցիներին:
Փառատոնի նպատակը տարբեր ազգությունների արվեստի գործիչների ինտեգրումն էր, ինչպես նաեւ հայ հանդիսատեսի ծանոթությունն այլ ազգերի մշակութային արժեքներին: Ներկայացումներն անցան լի դահլիճներում` արժանանալով գյումրեցի հանդիսատեսի ջերմ արձագանքին: Բոլոր օրերի ներկայացումներից հետո դրանց հրապարակային քննարկում էր տեղի ունենում «Ցայգ» մարզային հեռուստատեսության եթերում: Փառատոնի նախագահը` Աճեմյանի անվան թատրոնի գեղարվեստական ղեկավար, ՀՀ ժողովրդական արտիստ, պրոֆեսոր Նիկոլայ Ծատուրյանն ամփոփիչ ասուլիսում նշել է, թե այս փառատոնի ամենամեծ ձեռքբերումը հանդիսականի վերադարձն էր թատրոն: «Սա իսկապես նվաճում է մեր կողմից, որովհետեւ երբ դերասանը դուրս է գալիս բեմ եւ տեսնում է լեփ-լեցուն դահլիճ, նա իսկապես ցանկություն ունի ստեղծագործելու: Հանդիսատեսն էլ ստանում է այն բավականությունը, որ թատրոնն է տալիս. աշխատում է նրա միտքը, աշխատում է նրա հոգին»,- ասել է նա: Դրամատուրգ Աննա Աղասարյանն այստեղ իր համար հայտնագործություններ է արել, տեսել երիտասարդ դերասանների, որոնք շատ խոստումնալից են, նաեւ ներկայացումներ, որոնք իրեն ոգեւորել եւ տրամադրել են անգամ որոշակի դերասանների համար թատերախաղեր գրելու, ինչը դրամատուրգի համար ուրախալի է: «Ես համոզված եմ, որ փառատոնը կապրի,- նշել է ժողովրդական արտիստ, պրոֆեսոր Վահե Շահվերդյանը : Սա վերջին տարիներին բացառիկ երեւույթ էր մեր հանրապետությունում եւ համոզված եմ` ավելին է դառնալու, որովհետեւ Ժողովուրդը սիրեց փառատոնը: Իսկ դա ամենակարեւոր բանն է»:
«Դուետ» միջազգային թատերական փառատոնը Գյումրիում առաջին անգամն էր անցկացվում: Այսուհետեւ այն կդառնա ավանդական եւ կկազմակերպվի երկու տարին մեկ:
