ՌԴ Գերագույն դատարանը օրինական է ճանաչել Ստավրոպոլի երկրամասի հանրակրթական դպրոցներում հիջաբ կրելու արգելքը:
Ավելի վաղ համապատասխան վճիռ կայացրել էր Ստավրոպոլի երկրամասային դատարանը, ընդգծելով, որ ՌԴ-ում ամրագրված է կրթության աշխարհիկ բնույթը: «Արտաքին տեսքին առնչվող սահմանափակումը կապահովի ուսումնական հաստատության բնականոն գործունեությունը, տարբեր դավանանքների հետեւորդ աշակերտների իրավահավասարությունը: Սովորողների արտաքին տեսքը պետք է համապատասխանի գործնական ոճին եւ կրի աշխարհիկ բնույթ», ասվում էր առաջին ատյանի դատարանի վճռի մեջ:
Սակայն դատավճիռը չէր գոհացրել մահմեդականներին: Նրանք գանգատվել էին Գերագույն դատարանին, ասելով, թե կրոնական ատրիբուտներով հագուստ կրելու արգելքը խախտում է իրենց սահմանադրական իրավունքները: Բացի դրանից, իրենք ստիպված են երեխաներին ուղարկել կրոնական դպրոցՙ մեդրեսե, կամ ընտրել էքստերնատը:
Ինտերֆաքս գործակալությունը հաղորդում է, որ հիջաբների պատմությունը հասարակական լայն արձագանք էր գտել 2012-ի աշնանը, երբ գլխաշոր կրող 5 աշակերտուհիների հեռացրել էին պարապմունքներից: Այն ժամանակ երկրամասի յուրաքանչյուր դպրոցի հանձնարարվել էր ունենալ սեփական համազգեստ: Նաեւ արգելվել էին դեմքը ծածկող հագուստները:
