«Նուբարաշեն» քրեակատարողական հիմնարկի ցմահ դատապարտյալ Մանվել Հազրոյանը պատժախցում ծածկոցի բարակ կտրած շերտակտորով կախվելով ինքնասպանություն է գործել: Հազրոյանը պատժախուց էր տեղափոխվել հունիսի 11-ինՙ աշխատակիցների օրինական պահանջները չկատարելու համար, եւ նրա նկատմամբ կիրառվել էր կարգապահական տասնօրյա տուժ: Հազրոյանը ցմահ ազատազրկման էր դատապարտվել նոյեմբերի 19-ին ԼՂՀ ՊԲ հարավային զորամասում տեղի ունեցած արյունալի միջադեպի համար, որի հետեւանքով հրազենային կրակահերթից զոհվել էին ժամկետային զինծառայողներ Լեւոն Եսայանը, Ներսես Գալոյանը, Նարեկ Սահակյանն ու Նվեր Սարգսյանը: Հրազենային տարբեր աստիճանի վիրավորումներ էին ստացել ժամկետային զինծառայողներ Սարգիս Մելքումյանը, Խաչիկ Ալեքսանյանը, Մասիս Գրիգորյանն ու Մանվել Հազրոյանը:
22-ամյա ցմահ դատապարտյալի ինքնասպանության վերաբերյալ երեկ հաղորդագրություն է տարածել մարդու իրավունքների պաշտպան Կարեն Անդրեասյանըՙ նշելով, որ կատարվածը հերթականորեն ապացուցեց, որ քրեակատարողական հիմնարկներում բացակայում է սոցիալ-հոգեբանական պատշաճ ծառայությունը. նախատեսված է 1 հոգեբան 100-ից ավելի ցմահ դատապարտյալի համար, բացակայում են վերականգնողական ծրագրերը, չկան մշակութային, սպորտային միջոցառումներ, պատիժը կրելու ընթացքում չեն ստեղծվում աշխատելու, կրթություն ստանալու հնարավորություններ, բացակայում է գործերի վերանայման արդյունավետ մեխանիզմ, բացակայում է ցմահ ազատազրկման նշանակման, կիրառման, ռեժիմների փոփոխության եւ վաղաժամկետ ազատ արձակման ճկուն եւ տարբերակված համակարգ: Աշնանը այս եւ քրեակատարողական հիմնարկներում այլ խնդիրների վերաբերյալ օմբուդսմենը հանդես կգա հրապարակային զեկույցով:
