ԼՈՆԴՈՆՈՒՄ ՀԱՆԴԻՍԱՎՈՐՈՒԹՅԱՄԲ ՆՇՎԵԼ Է ՄԱՆՈՒԵԼ ԱԴԱՄՅԱՆԻ ԳՐԱԿԱՆ ԳՈՐԾՈՒՆԵՈՒԹՅԱՆ 50-ԱՄՅԱԿԸ
«Արմենպրես»
Լոնդոնի Սուրբ Եղիշե եկեղեցու դահլիճում, Հայ առաքելական եկեղեցու Անգլիայի թեմի առաջնորդ Տեր Վահան եպիսկոպոս Հովհաննիսյանի, Լոնդոնում ՀՀ ժամանակավոր հավատարմատար Արա Մարգարյանի, Հայաստանից ժամանած արվեստագետների եւ համայնքի գրասեր հասարակության ներկայությամբ տեղի է ունեցել բանաստեղծ, թատերագիր Մանուել Ադամյանի գրական գործունեության 50-ամյակին նվիրված հանդիսություն: Ինչպես «Արմենպրես»-ին տեղեկացրին Հայաստանի գրողների միությունից, ՀԳՄ նախագահ Լեւոն Անանյանն իր բացման խոսքում ընդգծել է Ադամյան գրողի եւ մշակութային գործչի դերակատարությունը, արժեւորել նրա տեղը արդի հայ գրական ընտանիքում:
Օրվա գլխավոր բանախոս, պրոֆեսոր Սուրեն Դանիելյանը բնութագրել է գրողի ստեղծագործության հատկանիշներն եւ արժանիքները: Նա ընդգծել է գրական-մշակութային գործունեության կողքին Մանուել Ադամյանի կրթական առաքելությունը. 1971 թ. Երեւանից վերադառնալով Բեյրութ` նա նշանակվում է Սահակյան վարժարանի տնօրեն, ապա աշխատում Երվանդ Հյուսիսյան հայագիտական հիմնարկում: Գրականագետն անդրադարձել է նաեւ գրողի ազգային-քաղաքական տիպարին: Ապրելով Մերձավոր Արեւելքում` բեյրության հայկական հորձանուտի մեջ, նա եղել է հնչակյան «Արարատ» թերթի խմբագիրներից մեկը: Լիբանանյան քաղաքացիական հյուծիչ պատերազմների ընթացքում նաեւ զենք է վերցրել` պաշտպանելու հայի համայնքին, ծայրահեղական ուժերը նույնիսկ նրան առեւանգել են, եւ հրաշքով կենդանի է մնացել: Լոնդոնյան շրջանում նա շարունակել է ստեղծագործական բեղուն առօրյան, բնականաբար նաեւ հասարակական-մշակութային գործունեությունը: Այստեղ նա հիմնել է «Կոչնակ» երկշաբաթաթերթը, իսկ ահա 15 տարի անընդմեջ հրատարակում է «Նոր սերունդի ձայն» ամսագիրը, որտեղ կարողանում է համադրել հայության հին ու նոր սերունդների նվիրաբերումը ազգային կյանքին:
Հաճելի անակնկալ էր Մանուել Ադամյանի «Հավատքի որդին» պիեսից փոքրիկ հատվածի բեմադրությունը (բեմադրիչ` Ռուբեն Քոչար), մասնակցությամբ հայաստանցի արվեստագետներ Հարություն Մովսիսյանի, Նարինե Քոչարի եւ այլոց: Հարություն Մովսիսյանն ընթերցել է նաեւ Ադամյանի բանաստեղծություններից: Ալեքսանդր Սպենդիարյանի անվան օպերայի եւ բալետի ակադեմիական թատրոնի մեներգչուհի Գայանե Գրիգորյանը ներկաներին խանդավառել է Սայաթ-Նովայի, Կոմիտասի, Արտեմի Այվազյանի երգերի, «Անուշ» օպերայից հատվածների կատարումով:
Թեմի առաջնորդը Գարեգին Բ Վեհափառ հայրապետի կողմից գրողին է հանձնել «Սուրբ ՍահակՍուրբ Մեսրոպ» շքանշանը: «Իմ Հայաստան» փառատոնի մշակութային բաժնի պետ Լաուրա Ավետիսյանը բանաստեղծին է հանձնել ՀՀ Սփյուռքի նախարարության «Մայրենիի դեսպան» մեդալը, իսկ 2010թ. Մանուել Ադամյանը ՀՀ նախագահի կողմից արժանացել է նաեւ «Մովսես Խորենացի» մեդալի: Երեկոն ավարտվել է Մանուել Ադամյանի երախտագիտական խոսքով:
Հաջորդ օրը ՀԳՄ նախագահ Լեւոն Անանյանը «Գրիգոր Նարեկացու կարեւորագույն դասը» թեմայով դասախոսություն է կարդացել Լոնդոնի հայ համայնքի ներկայացուցիչների համար:
