Թեեւ հունիսի 16-ինՙ վարչապետ Էրդողանի ստամբուլյան հանրահավաքի օրը, թուրքական ոստիկանությունը ցուցարարներից ազատել էր Թաքսիմի հրապարակն ու «Գեզի» զբոսայգին, սակայն բախումները դեռեւս շարունակվում են տարբեր թաղերի փողոցներում: Այդպիսի թաղերից է մասամբ հայերով բնակեցված Շիշլին, որտեղ ոստիկանության եւ ցուցարարների բախումների թատերաբեմ է դարձել Շիշլիի հայկական գերեզմանոցը:
Այդ մասին նախորդ օրը, հենվելով թուրքական aykiridogrular.com էլեկտրոնային թերթի վրա, տեղեկացրել է Ստամբուլի «Հայթերթ» կայքէջը: Ըստ տեղեկության, ոստիկանությունը ներխուժել է գերեզմանոց, թակարդ է լարել ցուցարարների դեմ, եւ գերեզմանաքարերի արանքից արցունքաբեր գազ է արձակել նրանց վրա:
Թուրքական էլեկտրոնային թերթը դա համարել է անարգանքի դրսեւորում, դատապարտել է ոստիկանությանը եւ, ինչպես «Հայթերթն» է նշում, ավելացրել. «Թուրքիայի վարչապետ Էրդողանն ու նրա կողմնակիցներն աղմուկ-աղաղակ էին բարձրացնում, թե ցուցարարները ներխուժել են մզկիթ եւ այնտեղ օգտագործել ալկոհոլային խմիչք: Մինչդեռ մզկիթում վիրավորներ էին, նրանք այնտեղ էին ապաստանել ոստիկանության հետապնդումից խուսափելու նկատառումով: Սակայն երբ խոսքը վերաբերում է Շիշլիի հայկական գերեզմանոցին, թուրքական պետությունն ու ոստիկանությունը խնդիր չեն տեսնում ներխուժելու եւ գերեզմանոցը որպես թակարդ լարելու վայր, թաքստոց օգտագործելու մեջ որպեսզի արցունքաբեր գազ կիրառեն ցուցարարների դեմ: Կարծում ենք, պետությունն ու ոստիկանությունը պետք է անհապաղ ներողություն խնդրեն հայ ժողովրդից, գոնե մի քիչ մեղմելու համար այս անարգանքի տպավորությունը: Գերեզմանոցները չեն կարող որպես թաքստոց ծառայել անվտանգության ուժերի համար»:
