Աշխարհում հարյուրավոր ցուցահանդեսներ տված Արա Գյուլերը հինգերորդ անգամ գտնվում է Հայաստանում:
Երեկ տեղի ունեցավ լուսանկարչի ցուցահանդեսը Ազգային պատկերասրահում, որտեղ տեղ ու դադար չկար:
Արա Գյուլերը նշեց, որ այս անգամ իր հետ 130 նկար է բերել, սակայն տարածքի պատճառով չեն կարողացել բոլորը ցուցադրել` 35-ը դուրս է մնացել:
Վերջին անգամ Գյուլերը Հայաստանում եղել էր խորհրդային տարիներին: Լուսանկարիչը կես կատակ-կես լուրջ համեմատական անցկացնելով այս տարիների ընթացքում կատարված փոփոխությունների միջեւ ասաց. «Ամենանկատելի փոփոխությունը կանանց բարձրակրունկ կոշիկներն են»:
Արա Գյուլերը հիշելով իր մտերիմ ընկերոջը` Սերգեյ Փարաջանովին, պատմեց, որ մի քանի անգամ լուսանկարել է Փարաջանովին, իսկ նա էլ իր նկարները կտրել ու կոլաժներ է պատրաստել:
Ըստ լուսանկարչի, լուսանկարչությունը արվեստ չէ, արվեստը սուտ բան է: Նա ընդգծում է, որ լուսանկարիչն ամեն ինչի պետք է պատրաստ լինի:
Գյուլերը լուսանկարել է այնպիսի հանրահայտ մարդկանց, ինչպիսիք են Բեռնար Ռասսելը, Ուինսթոն Չերչիլը, Առնոլդ Թոյնբին, Պաբլո Պիկասոն եւ Սալվադոր Դալին:
Դարի լավագույն լուսանկարիչներից մեկը հայաստանյան ցուցահանդեսից հետո իր աշխատանքները կնվիրի մեր Ազգային պատկերասրահին:
Մանկության տարիներին Ա. Գյուլերի վրա մեծ ազդեցություն է գործել կինոն, երազել է դառնալ ռեժիսոր կամ սցենարիստ: Այդ ժամանակ նրա մի քանի պատմվածքներ հրատարկվել են գրական ամսագրերում եւ հայկական թերթերում: Գյուլերը շարունակել է կրթությունը Ստամբուլի համալսարանի տնտեսագիտության ֆակուլտետում, այնուհետեւ համալսարանից դուրս է մնացել եւ ծառայել բանակում: Տաղանդավոր արվեստագետն իր լրագրողական ուղին սկսել է 1950 թ. «Ենի Իսթամբուլ» թերթում, 1956 թ. «Թայմ Լայֆի» ֆոտոլրագրող էր, իսկ 1958-ին «Փարի Մատչի» եւ «Ստեռնի»: Գրեթե նույն ժամանակահատվածում աշխատանքի է անցնում «Մագնում» գործակալությունում:
Լուսանկարիչը մի ակնարկ է պատրաստում Նոյյան տապանի մասին, եւ այդ լուսանկարներից, ավելի քան հարյուրը բաժանվում են «Մագնում ֆոտոզի» կողմից: Այդ տարիներին նա նաեւ ներկայացնում է Նեմրութ լեռը, եւ աշխարհն իմանում է Նեմրութի մասին լուսանկարների միջոցով: Նրա կարեւոր ակնարկներից է նաեւ մոռացված Աֆրոդիսիաս քաղաքի վերահայտնաբերումը, եւ նույն ճանապարհով այն եւս ներկայացվում է աշխարհին: Մինչեւ 1961 թ. աշխատել է որպես «Հայաթ» ամսագրի լուսանկարչական բաժնի ղեկավար, իսկ Միացյալ Թագավորությունում հրատարակված «Լուսանկարչության բրիտանական ամսագիր» տարեգրքում Գյուլերը ճանաչվել է աշխարհի յոթ լավագույն լուսանկարիչներից մեկը: Նույն տարում դարձել է ASMPի (Մեդիա լուսանկարիչների ամերիկյան միություն) անդամ միակ ներկայացուցիչը Թուրքիայից, 1962 թ. Գերմանիայում ստացել է «Լեյկայի վարպետ» մրցանակը: Նրա լուսանկարը Պիկասոյի ծննդյան 90-րդ տարեդարձի կապակցությամբ եղել է «Սկիրա» հրատարակչության կողմից հրատարակված «Պիկասո. մետամորֆոզ եւ միասնություն» գրքի անգլերեն, ֆրանսերեն եւ գերմաներեն հրատարակությունների առաջին էջին: Ապա հրավիրվում է Ամերիկա, որտեղ լուսանկարել է հայտնի ամերիկացիների: Այդ լուսանկարները հետագայում ցուցադրվել են աշխարհի շատ երկրներում «Ստեղծագործ Ամերիկա» վերտառությամբ: 1992 թ. մեծն ճարտարապետ Սինանի գործերի նրա լուսանկարները հրատարակվել են Ֆրանսիայում, ԱՄՆում եւ Մեծ Բրիտանիայում: Նույն տարում նրա «Ապրել Թուրքիայում» գիրքը հրատարակվել է ԱՄՆում, Մեծ Բրիտանիայում եւ Ֆրանսիայում: 2002 թ. Ֆրանսիայի կառավարությունը Արա Գյուլերին շնորհել է արվեստի եւ գրականության պատվո լեգեոնի շքանշան, ինչպես նաեւ Փարիզ քաղաքի շքանշան: Գյուլերը Յիլդիզի տեխնիկական համալսարանից ստացել է պատվավոր դոկտորի կոչում, արժանացել է նաեւ մշակույթի եւ արվեստի գծով նախագահական մեծ մրցանակի, մշակույթի եւ զբոսաշրջության նախարարության մրցանակի մշակույթին եւ արվեստին մատուցած ծառայության համար, Թուրքիայի Ազգային ժողովի մեծ մրցանակ մատուցած բացառիկ ծառայության համար:
2012 թ. Արա Գյուլերը պարգեւատրվել է ՀՀ մշակույթի նախարարության Ոսկե մեդալով:
Հատկանշական է, որ Արա Գյուլերի մասին գրվել է ութ դոկտորական թեզ:
Գյուլերը նշում է նաեւ, որ միշտ վազել է երջանկության հետեւից, սակայն այդպես էլ չի գտել. «Ինձ համար երջանկություն է այն, ինչը օբյեկտիվի միջից տեսնում եմ»:
Ա. Գյուլերը հրաժարվեց խոսել քաղաքականության, հայ-թուրքական հարաբերությունների մասին պատճառաբանելով, որ ինքը պետական գործերին չի խառնվում, եւ ավելացրեց. «Ատում եմ քաղաքականությունը. աշխարհի վրա գոյություն ունեցող բոլոր քաղաքական գործիչները թող գրողի ծոցը կորչեն»:
Աշխահահռչակ ստամբուլահայ լուսանկարիչն անդրադառնալով ցուցադրված լուսանկարներինՙ ասաց. «Հավնեցաքՙ հավնեցաք, չհավնեցաքՙ ի՞նչ ընեմ»:
Ցուցահանդեսը կշարունակվի երեք ամիս:
