«Տաշիր» բարեգործական հիմնադրամը ՀՀ զինված ուժերին շուրջ 200.000 դոլար արժողությամբ 10 նոր մեքենա է նվիրաբերել: Տրամադրված մեքենաների մակնիշներն ընտրվել են համաձայն ՀՀ ՊՆ ներկայացրած պահանջարկի, իսկ բաշխումը զորամասերին կիրականացնի նախարարությունը:
«Յուրաքանչյուր երկրի բանակ առավել հզոր է իր հասարակության աջակցությամբ ու սիրով: Եվ յուրաքանչյուրի պարտքն է նեցուկ լինել մեր անվտանգության երաշխավորինՙ թե՛ բարոյապես, թե՛ հնարավորության սահմաններում տրամադրել նաեւ նյութական օժանդակություն», ասաց ԱԺ պատգամավոր Կարեն Կարապետյանի գրասենյակի ղեկավար Արտակ Ճաղարյանըՙ հավելելով, որ հիմնադրամը, ի թիվս այլ ոլորտների, առաձնահատուկ ուշադրություն է դարձնում նաեւ հայոց բանակինՙ տարիներ շարունակ տրամադրելով աջակցություն: 2011-ին էլ է հիմնադրամը մեքենաներ տրամադրել զինված ուժերին:
