Բայց Թաքսիմ հրապարակը հազիվ թե վերածվի Թահրիրի
Երեկ Ստամբուլի օդանավակայանում, Մարոկկո ուղեւորվելուց առաջ, Թուրքիայի վարչապետ Էրդողանը, նկատի ունենալով զբոսայգու ծառերի առնչությամբ Թաքսիմ հրապարակում ոստիկանության եւ ցուցարարների միջեւ բռնկված ու երկրի 67 քաղաքներում տարածված ընդհարումները, ասաց. «Այս գործողությունները սարքել են ծայրահեղականները, որոնց անմիջականորեն ղեկավարում է ընդդիմադիր Ժողովրդա-հանրապետական կուսակցությունը: Զբոսայգու ծառերի հատումը պատրվակ է: Ի՞նչ կապ կարող է ունենալ Անկարան կամ Իզմիրը Ստամբուլի զբոսայգու հետ»:
Թուրքիայի վարչապետը միաժամանակ նշեց, որ անկարգությունների հետեւանքով տուժել է 160 ոստիկան եւ 60 քաղաքացի: Դրա նախորդ օրը Ստամբուլում վարչապետ Էրդողանն ասել էր, որ Թաքսիմ հրապարակն ամբողջությամբ վերակառուցվելու է, նախատեսվում է հատել 12 ծառ, վերականգնելու են դեռեւս 1780-ին սուլթան Սելիմ 3-րդի օրոք կառուցված «Սելիմիե» զորանոցը, ապա եւ ավելացրել. «Տիրոջ կամքով քանդելու ենք Աթաթուրքի անվան մշակույթի պալատը: Տեղը կկառուցենք օպերայի շքեղ թատրոն, ինչպես նաեւ մզկիթ: Կառուցելու համար Ժողովրդա-հանրապետական կուսակցության նախագահից կամ մի քանի թափթփուկից թույլտվություն չեմ խնդրելու»:
Կառավարամետ լրատվամիջոցները, ինչպիսիք են «CNN-turk-ը», «Հաբեր-թուրքը», «Սաբահ» թերը եւ այլն, հակված են հաստատելու ոստիկանության եւ ցուցարարների բախումներում տուժածների մասին վարչապետ Էրդողանի հրապարակած տվյալները: Ընդդիմադիր լրատվամիջոցների տվյալներով, միայն երեկ, երբ արդեն դադարեցվել էին ինչպես Թաքսիմի, այնպես էլ Անկարայի Կարմիր մահիկ հրապարակների ցույցերը, Ստամբուլի Բեշիքթաշ թաղամասում տուժել են հարյուրավոր ցուցարարներ, որոնց տեղափոխել են մզկիթ, որ առաջին օգնությունը ցույց տան: Ըստ այս լրատվամիջոցների, կան նաեւ սպանվածներ, պարզապես իշխանությունները քողարկում են այդ փաստը, Անկարայում ցուցարարները ճակատամարտ են մղել անվտանգության ուժերի դեմ, Իզմիրում ողջ բնակչությունը դիմադրության վճռականությամբ փողոց է դուրս եկել:
Ավելացնենք, Իզմիրում ցուցարարները հրկիզել են Էրդողանի «Արդարություն եւ բարգավաճում» կուսակցության քաղաքային վարչության շենքը, Անկարայում բարիկադներ կառուցելու համար արմատախիլ են արել ծառերը, Ստամբուլում փորձել են ճեղքել ոստիկանության շղթան, որ հարձակվեն վարչապետի գրասենյակի եւ վերջինի կուսակցության վարչության շենքի վրա: Ցուցարարների հարձակումներից չեն խուսափել քաղաքային ավտոբուսները, շրջակա խանութներն ու բնակարանները, ոստիկանության եւ լրատվամիջոցների մեքենաները, ինչպես նաեւ լրագրողները:
Այս ամենը, մանավանդ անկարգությունների 67 քաղաքներում տարածման ֆոնին, հիմք է տալիս ենթադրելու, որ ցուցարարների խնդիրը Թաքսիմի զբոսայգու 12 կաղնիները չեն, որքան էլ դրանք լինեն 80-ամյա: Այս ենթադրությունը հաստատում է անկարգություններին Սպիտակ տան եւ Եվրոմիության արձագանքը, որոնք խոհեմության կոչ են արել Էրդողանի կառավարությանը, ցուցարարների նկատմամբ ուժի անհամաչափ օգտագործման պատճառաբանությամբ: Այդ ընթացքում միջազգային լրատվամիջոցները բռնապետ են անվանել Թուրքիայի վարչապետին, իսկ ամերիկյան «Թայմ» հանդեսը արել է հետեւյալ հարցադրումը. «Մի՞թե Թաքսիմը վերածվում է Թահրիր հրապարակի»:
Ստամբուլի Թաքսիմ հրապարակը հազիվ թե վերածվի եգիպտական Թահրիրի: Այսինքնՙ Էրդողանի «Արդարություն եւ բարգավաճում» կուսակցությունը չի հեռանա իշխանությունից: Բայց որ իսլամամետ այս կուսակցության գործունեությունը ոգեւորելով իսլամ-արմատականներին Թուրքիայում, սպառնալից բնույթ է ստանում քեմալականների համար, որոնց ներկայացնում է Ժողովրդա-հանրապետական կուսակցությունը, կասկած չի հարուցում:
Թաքսիմ հրապարակի զբոսայգում 12 ծառի հատման պատճառաբանությամբ Թուրքիայի 67 քաղաքներում կազմակերպված ցույցերը, թուրքական դրոշներն ու Աթաթուրքի ցուցապաստառները ձեռքին ցուցարարների հարձակումները «Արդարություն եւ բարգավաճում» կուսակցության վարչության շենքերի վրա, դրա վկայությունն են: Ի դեպ, 2007-ի խորհրդարանական ընտրություններից հետո, երբ հայտնի էր դարձել Էրդողանի կուսակցության հաղթանակը, Սահմանադրական դատարանը քննարկել էր երկրում միանձնյա իշխանության եկած այս կուսակցությունը փակելու հարցը, իսկ տասնյակհազարավոր քեմալականներ Ստամբուլում, Անկարայում, Իզմիրում «Թուրքիայի աշխարհիկ հանրապետական կարգերը պաշտպանելու» հանրահավաքներ էին կազմակերպել: Ցուցարարների ձեռքում նույնպես Աթաթուրքի ցուցապաստառներն էին եւ Թուրքիայի դրոշը: Ի դեպ, Ժողովրդա-հանրապետական կուսակցությունը Քեմալ Աթաթուրքն է հիմնադրել:
