Փետրվարի 1-ին լրացավ Արմեն Սարգսյանի` ՀՀ նախագահի պաշտոնից հրաժարվելու դիմումը հետ վերցնելու վերջնաժամկետը: Ըստ կարգիՙ ԱԺ նախագահ Ալեն Սիմոնյանն Ալեն Սիմոնյանին նշանակեց ՀՀ նախագահ:
Քպականներն ակտիվորեն շրջանառում են նախագահի իրենց թեկնածուի` Բարձր տեխնոլոգիական արդյունաբերության նախարար Վահագն Խաչատուրյանի անունը:
ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը նույնիսկ կոչ է արել ընդդիմադիր ուժերին քվեարկել իրենց թեկնածուի օգտնին:
«Հայաստան» խմբակցության պատգամավոր Ագնեսա Խամոյանն էլ արձագանքել է. «Մեր երկիրը պատերազմի տարած, մեր հայրենիքի 75%-ը թշնամուն հանձնած այս ապիկար իշխանությունը մտածում է, որ ընդդիմությունը պետք է քվեարկի իրենց նախագահի կամակատար թեկնածուի օգտի՞ն: Հիշեցնեմ, որ օրեր առաջ Նիկոլ Փաշինյանը հայտարարեց, որ նախագահի թեկնածուն լինելու է մարդ, որն անվերապահորեն կատարելու է իր հրահանգները: Նիկոլ Փաշինյանը խոսում էր թիմի ներդաշնակեցման մասին, եւ ոչ մի խոսք պետության ու պետության շահի մասին, այս պայմաններում ակնկալել, որ ընդդիմությունը կարող է քվեարկել Նիկոլ Փաշինյանի կամակատար թեկնածուի օգտին, իհարկե, զավեշտալի է, քաղաքական ցինիզմի դասագրքային օրինակ կարող է սա լինել»:
Հայտնի է, որ Վահագն Խաչատուրյանն ԱԺ-ում հանդիպելէ քպականների հետ, ներկայացրել իր կենսագրությունն ու իշխանական ուժից աջակցություն հայցել:
Նախնական հաշվարկով` ՀՀ նախագահի ընտրությունը տեղի կունենա փետրվարի վերջին, մարտի սկզբին, քանի որ նախագահի պաշտոնը թափուր մնալուց ոչ շուտ, քան 25 եւ ոչ ուշ, քան 35 օր հետո անցկացվում է նախագահի արտահերթ ընտրություն, եւ նախագահն ընտրվում է 7 տարի ժամկետով:
Հիշեցնենք, որ նախագահ կարող է ընտրվել 40 տարին լրացած, վերջին 6 տարում միայն ՀՀ քաղաքացի հանդիսացող, վերջին 6 տարում ՀՀ-ում մշտապես բնակվող, ընտրական իրավունք ունեցող եւ հայերենին տիրապետող յուրաքանչյուր ոք: Նախագահի պաշտոնի համար կարող է թեկնածու առաջադրել ԱԺ-ի պատգամավորների մեկ քառորդը:
Առաջին փուլում նախագահն ընտրվում է պատգամավորների ընդհանուր թվի ձայների առնվազն երեք քառորդով, երկրորդ փուլում` ձայների երեք հինգերորդով: Քանի որ, ինչպես ենթադրվում է, ընդդիմությունը ՀՀ նախագահի ընտրությունը կբոյկոտի ու չի քվեարկի, ուրեմն առաջին փուլում նախագահ չի ընտրվի, իսկ երկրորդ փուլում արդեն իշխող մեծամասնությունն, ապահովելով ձայների երեք հինգերորդը, կընտրի իր թեկնածուին:
Հայաստանի գլխավոր դատախազ Արթուր Դավթյանը` դհոլչի, սյունեցի քաղբանտարկյալներին ազատ արձակող դատավոր Բորիս Բախշիյանին դատող Դավիթ Աղրամանյանը` թմբկահար (նա հեղափոխության ժամանակ Նիկոլենց դըմբ-դըմբ-հու վանկարկումների հայտնի թմբկահարն է), Վահագն Խաչատուրյանի երաժշտական ունակությունները դեռ հայտնի չեն, բայց Փաշինյանն իր վերջին ասուլիսին էր հայտարարել, որ կառավարության, ԱԺ-ի քաղաքական մեծամասնության ու ՀՀ նախագահի միջեւ պետք է լինի «ներդաշնակություն»:
Այսպես, բոլորը հրահանգավորված ներդաշնակվում են, իսկ աններդաշնակները` պատժվում:
