Ըստ կիպրական https://cyprus-mail.com կայքէջի՝ Կիպրոսի «Փարոս» արվեստի հիմնադրամը 2023 թվականի իր համերգաշրջանը բացել է «սենսացիոն Լիպարիտ Ավետիսյանի՝ այսօր Եվրոպայի ամենահայտնի երիտասարդ տենորներից մեկի ելույթով, մի երգչի, որին Բի Բի Սիի «Մյուզիք մեգըզինը» որակել է որպես «ամենաընտիր երիտասարդական հերոսական հնչերանգը, որը կարելի է ցանկանալ»: Կիպրոսում նրան նվագակցել է դաշնակահարուհի Լիլիթ Հակոբյանը: Կայքէջը նշում է, որ հայ օպերային երգիչն իր եվրոպական դեբյուտը կատարել է 2016 թվականին, Քյոլնի օպերայում եւ միջազգային համբավ է ձեռք բերել այդ ժամանակվանից՝ կատարելով ամենատպավորիչ օպերային գլխավոր դերերգեր աշխարհի ամենահեղինակավոր օպերային բեմերում (Քովենթ Գարդեն, Բեռլինի պետական, Օսլոյի Նորվեգական, Ստրասբուրգի Հռենոսի օպերա, Սիեթլի, Մայնի Ֆրանկֆուրտի, Ցյուրիխի, Ավստրալիա օպերաներ, Մոսկվայի Մեծ թատրոն եւ այլն): Իր կարիերայի ընթացքում նա մարմնավորել է Ֆենտոնի, Ալֆրեդոյի եւ Մանտուայի դքսի (Վերդիի «Ֆալստաֆ», «Տրավիատա»), Խոսեի (Բիզեի «Կարմեն»), կոմս Ալմավիվայի (Ռոսինիի «Սեւիլյան սափրիչը») եւ այլ կարեւոր դերերգեր:
2016 թվականից Ավետիսյանը նաեւ Հայաստանի օպերայի եւ բալետի ազգային ակադեմիական թատրոնի առաջատար արտիստ է, որտեղ, բացի մի շարք օպերաների գլխավոր դերերգերից, նա կատարել է Վերդիի եւ Մոցարտի «Ռեքվիեմների» եւ Մալերի «Աշխարհի երգի» տենորի երգամասերը Հայաստանի Ազգային ֆիլհարմոնիկ նվագախմբի հետ:
Հունվարի 26-ին Կիպրոսում Լիպարիտ Ավետիսյանը կատարել է Վերդիի, Դոնիցետիի, Մասնեի, Չայկովսկու, Հարությունյանի եւ Ռախմանինովի ստեղծագործություններից, ինչպես նաեւ միջազգային երգացանկից ավանդական եւ գեղարվեստական երգերի մի ընտրանի:
Ա. Բ.
