Վերջերս տեղի ունեցավ ՀՀ Գիտությունների ազգային ակադեմիայի ղեկավարության, ինստիտուտների տնօրենների հանդիպումը Երեւանի պետական համալսարանի պրոֆեսորադասախոսական կազմի հետ: Հանդիպման ժամանակ քննարկվեցին գիտության եւ կրթության ոլորտների զարգացման հեռանկարները, ակադեմիական եւ ԲՈՒՀ-ական գիտության ինտեգրման հնարավոր տարբերակները:
ՀՀ ԳԱԱ նախագահ, ակադեմիկոս Աշոտ Սաղյանն ասաց. «Աշխարհում չկա մոդել, որը կիրառելի լինի բոլոր պետությունների համար: Յուրաքանչյուր պետություն պատրաստում է սիմբիոզի մի տարբերակ՝ հարմարեցնելով աշխարհաքաղաքական իրավիճակին, պետության խնդիրներին, առանձնահատկություններին, կրթության եւ գիտության ոլորտների զարգացման իր երկրի ավանդույթներին: Մեզ համար էլ ընդունելի է այդպիսի տարբերակը»:
Նա նշեց, որ Եվրոպական հանձնաժողովի դիտորդական խումբը մշտադիտարկում է անցկացրել Հայաստանում կրթության եւ գիտության ոլորտներում եւ որպես առավել իրատեսական մեր երկրի համար առաջարկել է տարբերակ, որը համահունչ է ֆրանսիական CNRS-ին (Գիտահետազոտական ազգային կենտրոն): «Համաձայն այդ տարբերակի՝ ԳԱԱ-ն իր համակարգով կարող է կատարել միջանկյալ դեր կրթության եւ արդյունաբերության միջեւ: Սա ցանցային համակարգ է, որը ներկայում հաջողությամբ կիրառվում է մի շարք եվրոպական առաջատար պետություններում: Սա մեզ համար առավել իրատեսական է, քանի որ հիմնարար գիտության զարգացմանը զուգահեռ զբաղվում է նաեւ գիտության կիրառական բաղադրիչի զարգացման հիմնահարցերով: Մենք այսօր չունենք ճյուղային ինստիտուտներ, որոնց նպատակն է հիմնարար արդյունքները վերածել կիրառականի եւ առաջարկել ներդրման: Օտարումից ընդամենը երկու ինստիտուտ է փրկվել՝ Կենսատեխնոլոգիայի գիտահետազոտական ինստիտուտը եւ Ալիխանյանի անվան ազգային գիտական լաբորատորիան: Այսօր մեզ պետք են ինստիտուտներ, որոնք կզբաղվեն գիտահեն տնտեսության եւ ռազմաարդյունաբերության համար գիտական հենք ստեղծելու հիմնահարցերով: Դա նշված է կառավարության կողմից ընդունված` ՀՀ-ում գիտության զարգացման ռազմավարական ծրագրում: Տնտեսության համար գիտական հենք պետք է ստեղծեն մեր ինստիտուտները, ուրիշ ինստիտուտներ չկան, հետեւաբար ՀՀ ԳԱԱ կազմակերպությունները, բացի հիմնարար գիտությունից, լրջորեն պետք է զբաղվեն նաեւ կիրառական գիտությամբ»,- ասաց Աշոտ Սաղյանը:
ՍՏԵՓԱՆ ՊԱՊԻԿՅԱՆ
