Ալեն Մանուկյանի, Ֆրենսիս Քյուրքչյանի եւ Ալեն Միկլիիի անուններին Կարինե Արաբյանի անունն է ավելացել վերջերս որպես փարիզյան նորաձեւության աշխարհի տաղանդավոր ստեղծագործողի: Իր երրորդ տասնամյակը թեւակոխած հայուհին արդեն իսկ արժանացել է եվրոպական նորաձեւության վարպետ դիզայների կոչմանը եւ առանձնանում է իր նրբաճաշակ ոճով: Էկզոտիկ կոշիկներ է ձեւավորել Մադոննայի համար եւ ոսկերչական զարդեր` Շանելի համար: Նրա գործերը հնարավոր չէ շփոթել մեկ ուրիշի ստեղծածի հետ, չնայած միշտ չէ, որ հասկանալի են դրանց գեղեցկության գաղտնիքները: Վերջին շջրանում նա «JN.Mellor Club» անվանումով նորաձեւության ակումբ է բացել, որի առիթով «Արմինյն Միրոր-Սփեքթեյթր» շաբաթաթերթի փարիզյան թղթակիցը հարցազրույց է ունեցել նրա հետ: Ստորեւ թարգմանաբար ներկայացնում ենք տեղեկություններ նրա մասին քաղված այդ հարցազրույցից:
Կարինե Արաբյանը ծնվել եւ մեծացել է Փարիզում: Գրականություն է սովորել «Սորբոն նուվելում», որից հետո զգալով նորաձեւության հանդեպ իր մեջ առաջացող կրքոտ հետաքրքրասիրությունը, ընդունվել է նախ նորաձեւության տեխնիկայի եւ արվեստների բարձրագույն EsMoD մասնավոր դպրոցը, այուհետեւ 90-ականների սկզբներին նաեւ «Բերսո Ստուդիան»: Ավարտելուց հետո սկսել է աշխատել որպես դիզայներների օգնական: Եռուն տարիներ են եղել, բայց Ծոցի առաջին պատերազմի սկզբնավորման պատճառով շատերի նման ինքն էլ անգործ է մնացել եւ ստիպված է եղել բաց անել իր սեփական ընկերությունը:
Պապն ու տատը Թուրքիայից Ֆրանսիա են գաղթել 1920-ական թվերին: Պապը գերազանց է տիրապետել ֆրանսերենին եւ կարողացել է շուտով աշխատանք գտնել ու Փարիզ տեղափոխել իր ընտանիքին: Ծնողները ծնվել են Ֆրանսիայում, փարիզյան արվարձաններից «Ջոնտիլի» կոչված թաղամասում, որտեղ հայկական ծաղկուն համայնք է գոյություն ունեցել: Հայրը աշխատել է որպես վարպետ դերձակ, իսկ մորական կողմի պապը` ընտանեկան արտելում` որպես հնակարկատ-կոշկակար: Ինքը` Կարինեն մեծացել է կաշվի եւ սոսնձի խառնածին հոտառության մթնոլորտում: Փորձել է գործվածքների անպետք կտորտանքներից իր «Բարբի» տիկնիկի համար պատրաստել գունեղ հագուստներ:
1994-ին մասնակցելով «Hyeres»ի նորաձեւության փառատոնին, որն այժմ Ֆրանսիայում նորաձեւության ամենահեղինակավոր մրցույթն է համարվում, նա սկիզբ է դրել իր կարիերային: «Ես ներկայացրեցի իմ աքսեսուարներն ու ոսկեղեն ստեղծագործությունները եւ մրցանակի արժանացա: Դա ինձ շատ ոգեւորեց եւ խթան հանդիսացավ ունենալու իմ սեփական «բրենդը», որը հետագայում ես առաջարկեցի «Swarovski» եւ «Chanel» ճանաչված հաստատություններին: Նրանց հետ աշխատակցելը իսկական դպրոց եղավ ինձ համար», խոստովանում է Կարինեն:
2000 թվականին, ընդլայնելով իր մտահորիզոնը, հրապարակ է հանել սուր քթով կանացի կոշիկների իր նոր հավաքածոն, որն այդ ժամանակ «ագրեսիվ ոճ» է համարվել: Բայց որոշ ժամանակ անց Marc Jacobs-ի եւ Chloe՛-ի նման դիզայներներ սկսել են հետեւել իր քայլերին, եւ «բրենդը» միջազգային համբավ է ձեռք բերել: Գնորդների թվում հայտնվել են Օդրի Թաթուն, Վանեսա Պարադին, Սկարլետ Ջոհանսոնը, Բեթ Դիտոն, Մադոննան եւ ուրիշներ: 2015-ից հետո որոշ ժամանակ դադար է տվել իր բազմազբաղ կյանքին եւ որոշել հետամուտ լինել իր անձնական երջանկությանը:
Խոսելով JN Mellor Club-ի մասին, որը նա հիմնել է գրաֆիկական դիզայներ եւ պատկերասրահի նախկին սեփականատեր Ֆրենկ Բլեզի համագործակցությամբ, նա նշել է, որ JN-ը իրենց երկուսի մայրերի սկզբնատառերն են, իսկ Mellor-ը 1920-ական թվերի հայտնի սյունակագրի անունն է եւ միաժամանակ Clash խմբի գլխավոր երգչի` Ջո Ստրամերի իսկական անունը` Ջոն Մելլոր, որ 1/8-րդ տոկոսով հայ էր: Այդ անունով փաստորեն ակումբի հիմնադիրները միավորել են իրենց համար կարեւորագույն երկու հատկանիշ` հավասարություն սեռերի միջեւ եւ նվիրվածություն ռոքնռոլի հանդեպ: «Մենք փորձել ենք ձերբազատվել կարծրատիպերից, նորաձեւության պարտադրված ազդեցություններից եւ ստեղծել նորը, անկաշկանդ կապը արվեստի եւ դիզայնի միջեւ: Մենք զրոյից, երբեմն դեն գցելու անպետք նյութից նոր ապրանք ենք ստեղծում, որն իր մեջ պոեզիա է պարունակում», բացատրում է Կարինեն եւ հավելում, որ իր եւ ակումբի մասին լրացուցիչ տեղեկություններ ստանալու համար կարելի է այցելել www.jnmellorclub.com կայքը:
Ավելացնենք, որ Կարինե Արաբյանը նաեւ նորաձեւության աշխարհում հայերի ներդրած լուման հետազոտել է եւ հասկանալով, որ ինքն այդ ասպարեզում հայտնի մարդկանց երկար շարքի շարունակողն է, տեղեկատվական եզակի մի գիրք է հրատարակել «Les Arme՛niens de la Mode» (Հայերը նորաձեւության ասպարեզում) խորագրով, որտեղ բացահայտումների շարքում ընդգրկել է այն փաստը, որ, օրինակ, Սկյապարելիի ձեռագործ սվիտերները պատրաստողը հայազգի մի կին է, որ ոչ միայն հյուսել է դրանք, այլեւ նախագծել դրանց համապատասխան նախշերը: Դա մեծապես զարմացրել է նրան եւ հուշել, որ հայերը ստեղծագործ ժողովուրդ են եւ իրենց նրբագեղ ճաշակն են ներդրել ֆրանսիական նորաձեւության աշխարհում:
Պատրաստեց` ՀԱԿՈԲ ԾՈՒԼԻԿՅԱՆԸ
(The Armenian Mirror-Spectator)
