Վերջերս ՀՀ ԳԱԱ երկրաբանական գիտությունների ինստիտուտի Հ. Կարապետյանի անվան երկրաբանական թանգարանում բացվեց «Շոուշան քարի հմայքը» խորագրով ցուցահանդեսը: Այն ներկայացնում է Չինաստանի Ժողովրդական Հանրապետության Ֆուջիան նահանգի ոչ նյութական մշակութային ժառանգությունը, դեկորատիվ-կիրառական արվեստի գանձերը: Ցուցահանդեսը նվիրված է Երկրաբանի միջազգային օրվան:
Ըստ գիտնականների, ներկայացված բոլոր ցուցանմուշները միավորում են չինական արվեստի յուրահատկությունները: Չինական արվեստը եւ արհեստներն առանձնանում են կատարման տեխնիկայի բազմազանությամբ: Նրանք իրենց արժանի տեղն ունեն համաշխարհային արվեստում: Անհրաժեշտ է նշել, որ 2024 թվականին Երկրաբանական թանգարանում առկա բնության ժառանգությունը ցուցադրվել է Չինաստանի Ֆուջիանի թանգարանում:
Ցուցահանդեսում ներկայացված Շոուշանքարը Չինաստանի ամենահայտնի գունագեղ քարերից մեկն է: Այդ քարերը արտահանվում են Ֆուցզյան նահանգի հյուսիսային Ֆուչժոու քաղաքի Շոուշան բնակավայրում: Այն դարեր շարունակ ծառայել է որպես արվեստի ստեղծման գործոն: Այս քարը մեծ նշանակություն ունի տեղի բնակչության համար: Նրանից պատրաստել են կնիքներ, զարդեր, եւ մինչ օրս այն իր հմայքը չի կորցրել: Ներկայում Չինաստանում այն վաճառվում է որպես թանկարժեք քար եւ օգտագործվում է փորագրության համար: Բնակիչները վստահ են, որ քարը բերում է հաջողություն: Ցուցահանդեսը բաց կլինի երեք ամիս:
ՍՏԵՓԱՆ ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
