Տրանսպորտի  էլեկտրոնային տոմսերի նոր համակարգի բացերը եւ դրանց հետեւանքները

Երեւանի հասարակական տրանսպորտի վճարային համակարգում կատարված վերջին փոփոխությունները լայն քննարկումների եւ դժգոհությունների ալիք բարձրացրեցին:

Հունվարի 1-ից նախատեսվում էր անցում կատարել QR կոդերի եւ էլեկտրոնային տոմսերի համակարգին, որը թույլ էր տալու վճարել ինչպես QR կոդերի, այնպես էլ բանկային քարտերի միջոցով: Սակայն Երեւանի քաղաքապետ Տիգրան Ավինյանի եւ նախկին քաղաքապետ Հայկ Մարությանի միջեւ տեղի ունեցած բանավեճից հետո որոշվեց երկարաձգել այս փոփոխության իրականացումը եւս մեկ ամսով: Չնայած դրան, հունվարի մեկից դադարեց հասարակական տրանսպորտում 100 դրամանոց մետաղադրամների օգտագործումը:

Այս նոր համակարգի ներդրումը բախվեց դժգոհությունների մեծ ալիքի: Շատ քաղաքացիներ անտեղյակ էին փոփոխություններից, եւ նրանց առաջին ուղեւորությունը  անվճար էր, քանի որ վարորդները, տեղյակ լինելով մարդկանց անտեղյակությանը՝ առաջարկում էին նրանց անվճար օգտվել տրանսպորտից: Ես ինքս ականատես եմ եղել նման դեպքերի, երբ վարորդները թույլ էին տալիս առանց վճարման երթեւեկել նրանց, ովքեր տեղյակ չէին նոր կարգերից:

Այնուամենայնիվ, նոր վճարային մեթոդների ներդրումը ստեղծեց նաեւ որոշ խնդիրներ: Առավել ակնհայտը տրանսպորտում գոյացող հերթերն են, որոնք հիմնականում ձեւավորվում են Telcell վճարային  տերմինալների մոտ: Այս տերմինալները հաճախ չեն արդարացնում իրենց, եւ մարդիկ ստիպված են լինում սպասել 2-3 րոպե՝ վճարումը հաստատելու համար:

Հերթերի գոյացումը դանդաղեցնում է ուղեւորահոսքը, իսկ որոշ դեպքերում ուղեւորները նույնիսկ ստիպված են լինում իջնել տրանսպորտից, քանի որ չեն հասցնում վճարել ժամանակին: Ես ականատես եմ եղել դեպքի, երբ ուղեւորը դուրս է բերվել տրանսպորտից՝ չկարողանալով վճարել ուղեվարձը: Այս իրավիճակներում ուղեւորների եւ վարորդների միջեւ հաճախ կարող էին լսվել ուղեւորների վիրավորական արտահայտությունները, որոնք ուղղված էին թե՛ վարորդներին, թե՛ ներկայիս իշխանություններին:

Չնայած այս դժվարություններին, առցանց վճարումները ունեն նաեւ իրենց «դրական» կողմերը: Telcell Wallet հավելվածի միջոցով հնարավոր է վճարել մեկ տոմսի գին եւ երթեւեկել մի քանի անգամ, ինչը մատնանշում է համակարգի որոշակի բացթողումներ: Օրինակ՝ եթե վճարումն իրականացվում է էկրանանկարով՝ առանց ինտերնետ միացման, հնարավոր է մեկ տոմսով երթեւեկել մեկից ավելի անգամներ: Արդյոք սա ծրագրային խնդի՞ր է, հստակ պատասխան տալ չեմ կարող:

Ընդհանուր առմամբ, նոր վճարային համակարգի ներդրումը, չնայած որոշակի «դրական» կողմերին, դեռեւս պահանջում է զգալի բարելավումներ՝ առավել հարմարավետ դարձնելու համար հասարակական տրանսպորտից օգտվողների կյանքը:

Շատ կարեւոր է, որ քաղաքային իշխանությունները ուշադրություն դարձնեն այս խնդիրներին, շտկեն տեխնիկական խոչընդոտները եւ ապահովեն քաղաքացիների համար ավելի հեշտ, հասկանալի ու հարմարավետ համակարգ, ինչը կկանխի հերթերի գոյացումը եւ կբարելավի տրանսպորտային ծառայությունների որակը:

ՄԵՐԻ ՍԱՀԱԿՅԱՆ

ՀՊՄՀ հեռուստալրագրության 3-րդ կուրսի ուսանող