Ապրիլի 19-ին Սերբիայի Վրնյաչկա Բանյա քաղաքում նշվեց այդ քաղաքում հայերի ներկայության հարյուր տարին:
1922 թվականին քառասուն հայ եղեռնապուրծ փախստականներ, բոլորն էլ Դյորթ Յոլից, հունական Սալոնիկ քաղաքում ստացել են Հարավսլավիայի թագավորություն մուտք գործելու թույլտվություն եւ ապաստանել են Վրնյաչկա Բանյայում: Այդ գործում նրանց աջակցել է սերբ գեներալ Ռելյա Բելիմարկովիչը: Նա հնարավորություն է ստեղծել, որ հայ գաղթականները չտարանջատվեն՝ բոլոր քառասունին ապաստան տալով իր դղյակում:
Միջոցառմանը Հայաստանի Հանրապետության դեսպան Աշոտ Հովակիմյանը, Վրնյաչկա Բանյայի քաղաքապետարանի նախագահ Բոբան Ջուրովիչը, ինչպես նաեւ «Վրնյաչկա Բանյայի հայեր» ընկերության նախագահ Չեդոմիր Արթինովիչը (Արթինյան) ծաղկեպսակներ դրեցին Ալեքսանդր Առաջինի հուշակոթողին: Ներկա էին մեծ թվով քաղաքացիներ, այդ թվում՝ հայ համայնքի ներկայացուցիչներ:
Հայաստանի դեսպանի հովանավորությամբ կազմակերպվել էր ցուցահանդես՝ «Հայերը հարյուր տարի Վրնյաչկա Բանյայում» խորագրով: Ցուցահանդեսի համահեղինակներ Սլավիցա Դավիդովիչը, Յովանա Բելանյանը եւ Ռելյա Դեր Բոգոսյանը լուսաբանեցին Վրնյաչկա Բանյայի հայերի յուրօրինակ կյանքի ուղին լուսանկարների միջով:
Վրնյաչկա Բանյայի քաղաքապետարանի նախագահ Բոբան Ջուրովիչն ասաց, որ Մշակույթի դղյակում կազմակերպված այս ցուցահանդեսով իրենք ոգեկոչում են Վրնյաչկա Բանյայի հայերին՝ հույս ունենալով է՛լ ավելի ամրապնդել սերբ եւ հայ եղբայրական ժողովուրդների մշակութային կապերն ու համագործակցությունը:
ԱՆՈՒՇ ԲԱԼԱՅԱՆ
