Ազգային ժողովը երեկ՝ հուլիսի 7-ին, երկրորդ ու վերջնական ընթերցմամբ հավանություն է տվել «Պաշտպանության մասին» օրենքում փոփոխություններ կատարելու նախագծին: Օրենսդրական փոփոխությունները միաձայն՝ 58 «կողմ» ձայնով ընդունվեց: Խորհրդարանական ընդդիմությունը ո՛չ հարցի քննարկմանը, ո՛չ էլ քվեարկությանը չէր մասնակցում. նրանց՝ ամիսներ առաջ հայտարարած բոյկոտը դեռ շարունակվում է:
Փոփոխություններից առանցքայինն այն է, որ Հայաստանի Զինված ուժերի Գլխավոր շտաբի պետն այսուհետ կունենա պաշտպանության նախարարի առաջին տեղակալի կարգավիճակ, բայց դա նրան թույլ չի տա, որ նախարարի բացակայության պարագայում վերջինիս գործառույթները կատարի:
Իշխանության ներկայացուցիչները՝ «Քաղաքացիական պայմանագիր» խմբակցության պատգամավորները, Գլխավոր շտաբի պետի լիազորությունները պաշտպանության փոխնախարարին վերապահելը բացատրում են հետեւյալ կերպ. թե՛ Ապրիլյան, թե՛ 44-օրյա պատերազմի հանգամանքների մասնակի կամ ամբողջական վերլուծությունը ցույց է տվել, որ այդ օրերին պաշտպանության նախարարները չեն իմացել՝ ինչո՞վ զբաղվեն, ի՞նչ անեն ու լիազորությունների ի՞նչ շրջանակ ունեն: Մի կառույցի մեջ, ասում են, երկու առանձին գերատեսչություններ կային, որոնք, ի դեպ, սուբյեկտիվ խնդիրներով ու անձնական հարցերով բավական խորն անջրպետված էին միմյանցից:
Ըստ իշխանության բացատրության, ստացվում է, օրենքի մեջ կարգավորումներ մտցնելով՝ ցանկանում են տարանջատել պաշտպանության նախարարի ու Գլխավոր շտաբի պետի լիազորությունները, որ, Աստված մի արասցե, պատերազմի ժամանակ հստակ լինի՝ պաշտպանության նախարարն ի՞նչ պետք է անի, շտաբի պետի լիազորությունները ստանձնող փոխնախարարն՝ ինչ:
Ոչ իշխանական՝ փորձագիտական շրջանակներն էլ փոխանցում են, որ իրականում իշխանականները պաշտպանական գերատեսչության կառուցվածքը մոտեցնում են ռուսական բանակի մոդելին: Նշենք, որ ՌԴ պաշտպանության նախարարի առաջին տեղակալը նույնպես ԳՇ պետի լիազորություններն ունի, եւ, ի դեպ, «Ազգ»ի հետ զրույցում ՔՊ-ական պատգամավորները չհերքեցին, որ օրենքի մեջ փոփոխություններ կատարելու նախագիծը մշակելիս աշխատել են ռուս գործընկերների հետ, լսել նրանց կարծիքներն ու քննադատությունը: Ռուս գործընկերների հետ աշխատելու ու համագործակցելու մասին նաեւ ՀՀ պաշտպանության նախարար Սուրեն Պապիկյանն ակնարկեց՝ նախագիծն ԱԺ-ում ներկայացնելիս: Բայց տարօրինակ է, որ Հայաստանի ռազմավարական գործընկերոջ հետ համագործակցության մասին հայաստանյան իշխանությունները խոսում են հենց այնպես, հարեւանցի:
ՍԵՎԱԿ ՎԱՐԴՈՒՄՅԱՆ
