Թուրքագետ Ռուբեն Մելքոնյանը համոզված է՝ Իրանն անպայման պատասխանելու է Իսրայելի՝ իրեն ուղղված հարվածներին: «Ազգ»-ի հետ զրույցում համոզմունք է հայտնում՝ տարծաշրջանում տեղի ունեցող գործընթացները, պայմանական ասած, Երրորդ համաշխարհային պատերազմի՝ այս պահին ընթանալու մասին են վկայում: Ըստ նրա՝ ակնհայտ է, որ այսօր աշխարհում տեղի ունեցող իրադարձությունները (այդ թվում՝ ռազմական), շաղկապված են միմյանց հետ, եւ այն, ինչ տեղի է ունենում, ենթադրենք Ուկրաինայում, ուղղակի կամ անուղղակի կերպով կապված է տարածաշրջանում սառած կամ ակտիվ կոնֆլիկտների հետ: Եվ ըստ այդմ էլ՝ պայմանականորեն կարող ենք ասել, որ Երրորդ համաշխարհային պատերազմն ընթացքի մեջ է:
«Պարզ է, որ Իրանը վաղուց ի վեր թիրախ է համարվում մի քանի պետությունների համար, ու այդ երկրներն էլ ընդդեմ Իրանի պարբերաբար քայլեր են արել ու անում: Ինչ-որ պահի այդ սառած կոնֆլիկտն ակտիվացման նշաններ պետք է ցույց տար: Ինչ վերաբերում է Իրանի կողմից լայնածավալ ռազմական գործողություններ սկսելուն, ապա այդ մասով կանխատեսումներ անելը դժվար է, բայց այն, որ Թեհրանն ինչ-որ կերպ պատասխան կտա Իսրայելին, աներկբա է»,- ներկայացնում է թուրքագետը:
Ինչ վերաբերոմ է Իրան-Ադրբեջան հարաբերություններին, ապա մեր զրուցակցի դիտարկումներով՝ վերջին շրջանում դրանք այնքան են լարվել, որ Բաքուն նույնիսկ հրահրող հայտարարություններով է հանդես գալիս: Թուրքագետը պաշտոնական Անկարայի լռության վրա է ուշադրություն հրավիրում՝ նշելով, որ Ադրբեջանի շուրթերով երբեմն նաեւ Թուրքիան է Իրանի հասցեին հոխորտանքներ հնչեցնում: Մելքոնյանի գնհատակատակով՝ եթե հանկարծ տարածաշրջանում պատերազմ սկսվի, ապա դա, իսկապես, լայնածավալ է լինելու՝ ներգրավելով Թուրքիան, Ադրբեջանը, Իրանը, Իսրայելը եւ այլն:
Մեր դիտարկմանը, թե այդ պարագայում ի՞նչ դիրքերում է լինելու Հայաստանը, Մելքոնյանն այսպես է պատասխանում է. «Նման գործընթացները պետությունների համար երկու իրավիճակ են ստեղծում՝ կա՛մ մանեւրելու ու ավելի բարեհաջող քաղաքական կուրս վարելու շանս են տալիս, կա՛մ՝ սպառնալիք դառնում ու պետությունը կործանման տանում: Հայաստանը հիմա այդ երկուսի արանքում է, ու եթե հավանական լայնածավալ կոնֆլիկտի քամին ճիշտ օգտագործի, ճիշտ կողմնորոշվի, ապա այդ դեպքում կարող է ոչ միայն փակել սպառնալիքների պատուհանը, այլեւ փորձի հնարավորությունների դուռը բացել: Բայց դրա համար, նախեւառաջ, հմտություններ ու պոպուլիզմից հեռու քաղաքականություն վարել, ինչպես նաեւ՝ Արեւելքը ոսկերչական ճշգրտությամբ ընկալելու ունակություն է պետք ունենալ, ինչը, ցավոք, հայաստանյան գործող իշխանությունները չունեն»:
ՍԵՎԱԿ ՎԱՐԴՈՒՄՅԱՆ
