Վարչապետ Նիկոլ Փաշինյանը կառավարության նոյեմբերի 10-ի նիստում «խաղաղության պայմանագրի» տրամաբանության շրջանակներում նաեւ Արցախի պաշտպանության բանակի մասին խոսեց: Նա տեղեկացրեց, որ Սոչիում Ռուսաստանի եւ Ադրբեջանի ղեկավարներին ներկայացրել է Ղարաբաղի իշխանությունների առաջարկը, որ եթե Արցախի շուրջը ապառազմականացված գոտի ստեղծվի, միջազգային երաշխիքներ էլ լինեն, ապա Արցախը նման մասշտաբի Պաշտպանության բանակ ունենալու կարիք չունի: Փաշինյանի այս հայտարարությունը պաշտոնական Ստեփանակերտը ոչ միանշանակ է ընդունել, ու նախորդ շաբաթվա ընթացքում ՊԲ-ի մասշտաբները փոքրացնելու առաջարկ-մտադրության մասով Արցախի քաղաքական ուժերը հիմնական քննադատական ռեպլիկներ ու մեկնաբնություններ հնչեցրին: Արցախի խորհրդարանի թե՛ իշխանական, թե՛ ընդդիմադիր խմբակցությունների պատգամավորները պնդում են՝ Արցախի անվտանգությունը նաեւ պաշտպանական բանակը պետք է ապահովի:
Համանման տեսակետին է նաեւ ՀՀ Ազգային ժողովի «Պատիվ ունեմ» խմբակցության քարտուղար, Արցախի նախկին նախագահ Բակո Սահակյանի նախկին խորհրդական Տիգրան Աբրահամյանը: Նրա համոզմամբ՝ վտանգավոր է անգամ այն հանգամանքը, որ հայաստանյան իշխանությունը ՊԲ-ի, այսպես ասած, «փոքրացման» թեման օրակարգ է բերում ու քննարկման առարկա դարձնում: Վտանգավոր է նաեւ այն հանգամանքը, շարունակում է, որ ըստ Փաշինյանի՝ ինքն այս հարցի մասով Արցախի իշխանությունների հետ ինչ-որ պայմանավորվածություններ ու փոխըմբռնում ունեն:
«Անկախ հանգամանքից, թե սահամանազատման ու սահմանագծման աշխատանքներից հետո Արցախում ապառազմականացված գոտի կձեւավորվի՞, թե՞ ոչ, միջազգային երաշխավորներ կլինե՞ն, թե՞ ոչ, ռուս խաղաղապահների թվաքանակը կավելանա՞, թե՞ ոչ, պաշտպանության բանակը բազմաթիվ գործառույթններն ունի: Եվ ստեղծված իրավիճակում, երբ Հայաստանից զորակոչ չի իրականացվում, առավել քան անտրամաբանական ՊԲ-ի կրճատումը»,- «Ազգ»ի հետ զրույցում ընդգծում է Աբրահամյանը:
Նա այն համոզմանն է, որ այժմ պետք է բարձրաձայնվեն ՊԲ-ում առկա բոլոր խնդիրները եւ պաշտպանական կառույցում պետք է ռեֆորմներ տեղի ունենան:
ՍԵՎԱԿ ՎԱՐԴՈՒՄՅԱՆ
