«Արմինյն Միրոր-Սփեքթեյթր» շաբաթաթերթի հոկտեմբերի 1-ի հերթական համարից տեղեկանում ենք, որ առաջիկա հոկտեմբերի 13-ին Ֆրեզնոյի պետհամալսարանի արդյունաբերական տեխնոլոգիաների մասնաշենքում տեղի է ունենալու հայազգի սոպրանո Զաբել Փանոսյանին նվիրված երաժշտագետներ Այան Նագոսկիի եւ Հարութ Առաքելյանի դասախոսությունը, որին տվել են «Ես քո ձայնի ծառան եմ» խորագիրը, վերցված այդ երկու մասնագետների համահեղինակությամբ լույյս տսած հատորի վերնագրից` «Զաբել Փանոսյան: Ես քո ձայնի ծառան եմ»:
Զաբել Փանոսյանը ծնվել է 1891 թվին Պարտիզակում եւ վախճանվել 1986-ին Նյու Յորքում: Ըստ լրատվության եղել է Ցեղասպանությունից մազապուրծ Ա. սերնդի ամերիկահայ ամենանշանակալի ձայներից մեկը, որ 1917-ի մարտից մինչեւ 1918-ի հունիսը ձայնագրել է 11 երգ Նյու Յորքի Կոլումբիա ձայնագրությունների (Columbia Records) ընկերությունում եւ բարեգործական համերգների միջոցով մեծ գումարներ է հանգանակել ի նպաստ հայ գաղթականների: Սերտորեն համագործակցել է «Տարոնի Սոխակ» հռչակված մեծանուն տենոր Արմենակ Շահմուրադյանի հետ: Նրա ձայնագրությունները տարիներ շարունակ ուղեկցել են ունկնդիրներին: Մեծ հաջողությամբ շրջագայել է Եվրոպայում, Փարիզում հանդիպել Կոմիտաս վարդապետին: Դժբախտաբար տասնամյակներ անց նրա կենսագրության եւ ձայնագրությունների պատմությունը մոռացության է մատնվել: Այժմ, շնորհիվ նոր տեխնոլոգիաների կիրառմանը կարծես վերականգնվում է նրա համբավը: Դրա վառ վկայությունն է լույս ընծայումը վերոնշված հատորի եւ ամենայն բծախնդրությամբ ամբողջական վերականգնումը նրա ձայնագրությունների:
Այան Նագոսկին երաժշտագետ-հետազոտող է: Վերջին տասնամյակում Բալտիմորում է աշխատում որպես ձայնագրությունների պրոդյուսեր: Առնինքնող դասախոսություններ է կարդացել Վաշինգտոնի կոնգրեսի գրադարանում, Աթենքի Օնասիսի անվան մշակույթի կենտրոնում, ինչպես նաեւ Չիկագոյի, Փենսիլվանիայի եւ Նյու Յորքի համալսարաններում: Վերոնշյալ դասախոսության ժամանակ նա ներկայացնելու է Զաբել Փանոսյանի կյանքն ու գործունեությունը, իսկ Հարութ Առաքելյանը` նրա առնչությունները Ֆրեզնոյի հետ:
Առաքելյանը տեսաժապավենների թողարկման խմբագիր է, հետազոտող երաժշտագետ: Ապրում է Լոս Անջելեսում եւ դասավանդում Կալիֆոռնիա համալսարանում (UCLA): Հոդվածներ է գրում հայկական երաժշտական գոհարների իր կատարած հետազոտությունների մասին:
Հ.Ծ.
