ՀՀ ԳԱԱ ֆիզիկայի կիրառական պրոբլեմների ինստիտուտում նշվեց Լույսի միջազգային օրը, որին մասնակցեցին աշակերտներ, ուսանողներ, ուսուցիչներ, դասախոսներ, գիտաշխատողներ:Մասնակիցներին ողջունեցին գիտության բնագավառի մասնագետները: Նրանք պատմեցին ինստիտուտի մասին, ներկայացվեց վերջին տարիների գիտական ձեռքբերումները:
Միջոցառման մասնակիցները շրջայց կատարեցին ինստիտուտի լաբորատորիաներում, մասնակցեցին հետաքրքրական գիտափորձերի: Գիտաշխատողները ցուցադրեցին գիտափորձեր՝ կապված լազերի ճառագայթման հաճախականության կրկնապատկման, միկրոմասնիկների վրա լազերի ճառագայթման ցրման միջոցով օդի աղտոտվածության աստիճանի որոշման հետ:
Ներկայացվեցին «Մի իսլանդական սագայի, արեգակնային քարի եւ Հյուսիս-ատլանտյան օվկիանոսում վիկինգների անհավատալի ճանապարհորդությունների մասին» զեկուցումը, ինչպես նաեւ «Լույսի աղբյուրներ» թեմայով զեկուցումները: Անցկացվեց վիկտորինա «Լույսի ֆիզիկական հատկությունները» թեմայով: Վիկտորինայի ամենաակտիվ 10 մասնակիցները ստացան պատվոգրեր:
Հարկ է նշել, որ Հայաստանում առաջին էլեկտրական լամպը վառվել է 1903թվականին Դիլիջան քաղաքում: Այստեղ Աղստեւ գետի վրա տեղադրվել է 10 ԿՎտ հզորությամբ հիդրոտուրբին:
ՍՏԵՓԱՆ ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
