Լրացավ վաստակաշատ գիտնական, ՀՀ ԳԱԱ հայագիտության եւ հասարակական գիտությունների բաժանմունքի ակադեմիկոս-քարտուղար, տնտեսագիտության դոկտոր,պրոֆեսոր Յուրի Սուվարյանի ծննդյան 80-ամյակը: Ծնվել է 1943-ի մայիսի 25-ին ԼՂ Սղնախ գյուղում: 1960-ին ավարտել է Ավետարանոց գյուղի միջնակարգ դպրոցը, 1965-ին` Երեւանի պետական համալսարանի տնտեսագիտական ֆակուլտետը, 1968-ին` ասպիրանտուրան:
ՀՀ ԳԱԱ ակադեմիկոս Յուրի Միքայելի Սուվարյանը, իր ավելի քան 55 տարիների գիտական գործունեությամբ մեծ նվաճումների է հասել տնտեսագիտության ասպարեզում, ակտիվ գիտահետազոտական աշխատանք է կատարել տնտեսագիտության եւ կառավարման տեսության հիմնարար խնդիրների վերաբերյալ: Նա գործնականում կառավարման գիտության արդի հայկական դպրոցի հիմնադիրն է:
Նրա գիտական հետաքրքրությունների ոլորտում են կառավարման տեսության եւ հայ կառավարչական մտքի պատմության արդի հիմնահարցերը: Նա ցուցաբերել է նոր մոտեցումներ ռազմավարական կառավարման էության եւ սկզբունքների մեկնաբանման, գործարարության ծրագրի մշակման մեթոդաբանության զարգացման ասպարեզում: Հայ իրականության մեջ պրոֆ. Յու. Սուվարյանը առաջինն է անդրադարձել հանրային կառավարման էության, մեթոդաբանության ու պատմական զարգացման հարցերին եւ առաջարկել յուրօրինակ լուծումներ:
Անդրադառնալով «Հանրային կառավարման տեսություն եւ պատմություն» գրքի անգլերեն հրատարակությանը, Կանադայի Կարլտոնի համալսարանի Հանրային քաղաքականության եւ կառավարման դպրոցի պրոֆեսոր, կառավարման եւ հանրային մենեջմենթի կենտրոնի տնօրեն Լեսլի Փալը գրել է. «Շատ տպավորված եմ դրա լայն ընդգրկունությամբ: Շատ հազվադեպ կարելի է հանդիպել մեկին, ով տվյալ ոլորտի պատմությունը տեսնում է նման պատմական խորությամբ եւ, իհարկե, նրա ներկայացրած տարածաշրջանային պատկերը շատ հետաքրքրական էր ինձ համար»:
Մասնակցել է հանրապետական, համամիութենական եւ միջազգային գիտաժողովների, որոնցում ներկայացրել է իր հետազոտությունների արդյունքները, իսկ դրանց մի մասը լույս է տեսել միջազգային հրապարակումներում: Պրոֆ. Յու.Սուվարյանը հրատարակել է 305 գիտական աշխատություն, այդ թվում՝ 48 մենագրություն, դասագիրք եւ ուսումնական ձեռնարկ: Նրա գիտական ղեկավարությամբ ու խորհրդատվությամբ տնտեսագիտության դոկտորի եւ թեկնածուի գիտական աստիճաններ են ստացել հարյուրից ավելի ասպիրանտ ու հայցորդ: Կառավարման մասնագիտությամբ գիտական կադրերի մեծ մասը նրա սաներն են: Հեղինակել է կառավարման տեսության հիմնարար աշխատություններ, ահա թե ինչու Յու. Սուվարյանը համարվում է կառավարման գիտության արդի հայկական դպրոցի հիմնադիրը:
2006 թ. Յու. Սուվարյանը, դառնալով Հայաստանի պետական տնտեսագիտական համալսարանի ռեկտոր՝ մեծ եռանդով ձեռնամուխ եղավ կրթահամակարգի բովանդակային եւ կառուցվածքային արմատական վերափոխումների՝ համահունչ միջազգային պահանջների բավարարմանը: 2006 թ. նա ընտրվել է ՀՀ ԳԱԱ թղթակից անդամ, 2010 թ.ի՝ իսկական անդամ, 2011թ.ին՝ ՀՀ ԳԱԱ հայագիտության եւ հասարակական գիտությունների բաժանմունքի ակադեմիկոս-քարտուղար:
Յու.Սուվարյանը 2006-2018 թթ. ՀՊՏՀ-ում գործող գիտական աստիճաններ շնորհող մասնագիտական խորհրդի նախագահն էր, 2006-2011թթ. եղել է «Բանբեր ՀՊՏՀ» գիտական հանդեսի գլխավոր խմբագիրը, հայրենական ու միջազգային գիտական հանդեսների խմբագրական խորհուրդների, հայերենի բարձրագույն խորհրդի անդամ:
Ակադեմիկոս Յու.Սուվարյանի մասնագիտական բարձր կարողությունները, գիտամանկավարժական վաստակը գնահատված են «Անանիա Շիրակացի» (2000), ԼՂՀ «Մայրական երախտագիտության» (2007), «Վաչագան Բարեպաշտ» (2013), միջազ. փիլիս. Ակադեմիայի «Դավիթ Անհաղթ», «Հայրենիքին մատուցած ծառայությունների համար» 1-ին աստիճանի (2011), ՀՀ Ազգային ժողովի «Պատվո մեդալ» (2013թ.) մեդալներով եւ «Հայրենիքին մատուցած ծառայությունների համար» 2-րդ աստիճանի (2017) շքանշանով: 2014թ.-ին արժանացել է Հայաստանի Հանրապետության Գիտության վաստակավոր գործչի կոչման: Նա ընտրվել է Բնական գիտությունների ռուսական (2016թ.) եւ Եվրոպական (2017թ.) ակադեմիաների արտասահմանյան անդամ, Դոնի Ռոստովի պետական տնտեսագիտական, Ռուս-հայկական, Արցախի եւ այլ համալսարանների պատվավոր պրոֆեսոր է:
Ներկայումս Յուրի Սուվարյանը մեծ ծավալի գիտակազմակերպչական աշխատանքներ է կատարում ՀՀ ԳԱԱ համակարգում:
Սիրով շնորհավորում ենք մեծ գիտնականին՝ ծննդյան հոբելյանի առիթով: Ցանկանում ենք քաջառողջության, երկար տարիների կյանք, անսպառ եռանդ, արեւշատություն եւ գիտական նորանոր հաջողություններ:
ՀՀ ԳԱԱ Մ. Քոթանյանի անվան տնտեսագիտության ինստիտուտ
