Վերջերս Երեւանում մեկնարկեց Յակով Զելդովիչի անվան 5-րդ միջազգային գիտաժողովը՝ նվիրված աստղաֆիզիկայի եւ հարակից բնագավառների արդի ձեռքբերումներին, ՀՀ Գիտությունների ազգային ակադեմիայի հիմնադրման 80-ամյակին:
Գիտաժողովը կազմակերպել է ՀՀ ԳԱԱ ԻԿՐԱՆԵՏ կենտրոն միջազգային կազմակերպությունը: Գիտաժողովին մասնակցում են ՀՀ կառավարության եւ ՀՀ Ազգային ժողովի ներկայացուցիչներ, ՀՀ ԳԱԱ նախագահության անդամներ, դիվանագիտական կորպուսի ներկայացուցիչներ, շուրջ 100 գիտնականներ Իտալիայից, Գերմանիայից, Չինաստանից, Ռուսաստանի Դաշնությունից, Ամերիկայի Միացյալ Նահանգներից, Անգլիայից, Հնդկաստանից, Իրանից, Չեխիայից, Բելառուսից:
Գիտաժողովին մասնակցում էին նշանավոր գիտնականներ, ովքեր ներկայացրեցին գործող առաջատար դիտակներով եւ արբանյակներով ստացված վերջին արդյունքները:
Կարեւորվեց ԻԿՐԱՆԵՏ-ի՝ որպես միջազգային համագործակցության կարեւոր հարթակի դերը: Այս հեղինակավոր միջազգային գիտաժողովի անցկացումը կարեւոր քայլ է աստղաֆիզիկայի ոլորտի զարգացման համար:
Գիտնականները գիտաժողովի ընթացքում ներկայացրեցին զեկուցումներ ժամանակակից աստղաֆիզիկայի արդիական ուղղությունների վերաբերյալ,ինչպես նաեւ խոշորամասշտաբ գիտափորձերի վերջին արդյունքները:
ՍՏԵՓԱՆ ՊԱՊԻԿՅԱՆ
