Վերջերս ՀՀ ԳԱԱ-ում տեղի ունեցավ «Science in Space Analog Missions: AMADEE-24 Mars Simulation Results and the Future Prospects» աշխատաժողովը: Այն կազմակերպել էին ՀՀ ԳԱԱ մոլեկուլային կենսաբանության ինստիտուտը եւ Հայկական տիեզերական ֆորումը:
Աշխատաժողովի ընթացքում ներկայացվեցին 2024 թ. Հայաստանում անցկացված AMADEE-24 Մարսի անալոգային հետազոտության գիտափորձերի արդյունքները: Քննարկվեցին WorldBiggestAnalog-2025 միջազգային անալոգային առաքելության շրջանակում գիտական նախագծերով մասնակցության հնարավորությունները, տիեզերական հետազոտությունների համատեքստում անցկացվող երկրային առաքելությունների դերը, դրանց գիտական արժեքը եւ հեռանկարները:
AMADEE-24-ը Մարսի անալոգային առաքելությունն է Հայաստանում, որն իրականացրել է Ավստրիական տիեզերագիտական ֆորումը՝ հյուրընկալվելով Հայաստանի օդատիեզերական գործակալության կողմից: Բարձր պատրաստվածությամբ անալոգային տիեզերագնացների փոքր խումբը սիմուլյացիոն սկաֆանդրներով տարբեր գիտափորձեր է անցկացրել՝ հիմք նախապատրաստելով մարդկանց եւ ռոբոտների մասնակցությամբ Մարսի ապագա առաքելությունների համար:
2025 թվականի հոկտեմբերին տեղի կունենա անալոգային լայնածավալ World s Biggest Analog (WBA) առաքելությունը, որը կազմակերպում է Ավստրիական տիեզերական ֆորումը: WBA-ն աշխարհում 10 անալոգային լաբորատորիաներ միավորող նախաձեռնություն է: Ուրախալի է,որ Հայաստանը դարձել է այս ծրագրի մասնակից:
ՍՏԵՓԱՆ ՊԱՊԻԿՅԱՆ
Ռուսաստանի բնագիտության ակադեմիայի պրոֆեսոր
