ՀՀ ԳԱԱ Ֆիզիկական հետազոտությունների ինստիտուտում բարձր ջերմաստիճանային նանոբջիջների կիրառմամբ ցույց է տրվել, որ ատոմ-մակերեւույթ վանդերվալսյան փոխազդեցությունից բացի ատոմային ռեզոնանսների հաճախության «կարմիր» շեղում է առաջացնում նաեւ ատոմ-ատոմ դիպոլ-դիպոլային փոխազդեցությունը: Գիտնականների կատարած աշխատանքը հնարավորություն է տալիս չափել ատոմ-դիէլեկտրիկ մակերեւույթ փոխազդեցության վանդերվալսյան գործակցի արժեքը, ինչը լավ համընկնում է տեսական հաշվարկների հետ:
Այս տեղեկատվությունը կարեւոր է ատոմական գոլորշիներ պարունակող սարքերի մինիատյուրիզացիայի համար: Բարձր ջերմաստիճանային նանոմետրական հաստության բջջի օգտագործումը, որի հաստությունը փոփոխվում է 30-1000 նմ միջակայքում եւ որը պարունակում է ալկալի մետաղի գոլորշիներ, թույլ է տալիս կատարել ատոմ-մակերեւույթ վանդերվալսյան փոխազդեցության երեւույթի ուսումնասիրություններ:
Հիմնավորվել է, որ ատոմական գոլորշիների խտության ավելացումն առաջացնում է լրացուցիչ մեծ հաճախային «կարմիր» շեղում: Այս շեղումն առաջանում է դիպոլ-դիպոլային փոխազդեցության շնորհիվ:
Աշխատանքն իրականացվել է բազային ծրագրի շրջանակում` Բուրգունդիայի համալսարանի (Դիժոն, Ֆրանսիա) գիտնականներ հետ համատեղ:
ՍՏԵՓԱՆ ՊԱՊԻԿՅԱՆ
