Հոկտեմբերի 2-6-ը Սոչիում՝ Սիրիուս դաշնային տարածքում, տեղի ունեցավ Ֆինանսական անվտանգության 3-րդ միջազգային օլիմպիադայի եզրափակիչ փուլը: Այս տարի եզրափակիչ էին անցել 19 երկրների շուրջ 500 դպրոցականներ եւ ուսանողներ, որոնք հաղթող են ճանաչվել որակավորման փուլերում:
Գ.Վ. Պլեխանովի անվան ռուսական տնտեսագիտական համալսարանի Երեւանի մասնաճյուղի ուսանողուհի Անի Հովհաննիսյանը դարձավ Ֆինանսական ապահովության միջազգային օլիմպիադայի 2-րդ աստիճանի հաղթող:
Գ.Վ.Պլեխանովի անվան ռուսական տնտեսագիտական համալսարանի Երեւանի մասնաճյուղը ներկայացնում էր տնտեսագիտության 9 ուսանող՝ «Տնտեսական գիտությունների» ամբիոնի վարիչ Բելլա Գաբրիելյանի եւ ամբիոնի դոցենտ Էլբիս Պեպլոզյանի ղեկավարությամբ:
Չորս օրվա ընթացքում եզրափակիչ փուլի մասնակիցներին մատուցվեց հարուստ ծրագիր՝ շփում ֆինանսների ոլորտի փորձագետների հետ, հանդիպումներ պոտենցիալ գործատուների հետ, կլոր սեղաններ, բանավեճեր եւ սեմինարներ: Բացի եզրափակիչ փուլի առաջադրանքներից, հարուստ ծրագիրը ներառում էր գիտաժողովներ, վարպետության դասեր եւ բանկային անվտանգության վերաբերյալ միջազգային քննարկումներ:
Երեւանի մասնաճյուղի թիմն իրեն դրսեւորեց բոլոր միջոցառումներում, ինչի համար նրանք արժանացան պատվոգրերի: Օլիմպիադան ուղղված է համակարգչային գիտության, հասարակագիտության եւ բանկային համակարգերի, ընկերությունների եւ հասարակ մարդկանց տնտեսական անվտանգությանն առնչվող գիտելիքների հանրահռչակմանը:
ՍՏԵՓԱՆ ՊԱՊԻԿՅԱՆ
