«Ռուոթլիջ» հրատարակչությունը (Լոնդոն-Նյու Յորք) լույս է ընծայել «Ի պա՛ր: Պարելը կյանքի միջով» (Dance On! Dancing Lhrough Life) պատկերազարդ ժողովածուն՝ նվիրված պարարվեստում ավագ սերնդի ներկայացուցիչների ներգրավվածությանը: Այն խմբագրել են պարագետներ Ստեֆանի Բարիջը (Սինգապուր) եւ Շառլոտ Սվենդլեր Նիլսենը (Դանիա): Հատորին հոդվածներւով եւ հարցազրույցներով մասնակցել են ավելի քան 50 պարողներ ու հեղինակներ տարբեր երկրներից: Ի թիվս բազմաթիվ հետաքրքրական նյութերի (օրինակ, հարցազրույց ավստրալացի 107-ամյա պարուհի Էյլին Քրամերի հետ), ժողովածուում ընդգրկվել է նաեւ «Մի կյանքի ուղեւորություն պարի մեջ. Աիդա Ամիրխանյանն Արծվի Բախչինյանի հետ զրույցում» հարցազրույցը (հայերեն տարբերակը տես «Ազգ», 25.03.2022): Ներկայացված է նաեւ Աիդա Ամիրխանյանի լուսանկարն իր ուսուցչի՝ մեծանուն պարադիր Մորիս Բեժարի հետ: Հատորի սկզբում զետեղված կենսագրացանկում տեղ են գտել նաեւ Աիդա Ամիրխանյանի եւ Արծվի Բախչինյանի համառոտ կենսագրությունները:
Սույն ժողովածուն արժեքավոր սկզբնաղբյուր է պարարվեստի, պարային մանկավարժության, սոցիալական եւ մշակութային ուսումնասիրությունների, գեղագիտության, միջառարկայական արվեստի, պարային թերապիայի և այլ թեմաներ ուսումնասիրողների համար:
Ա. Բ.
