Երեւանում գործող հայ ավանդական երաժշտության «Արսեն Պետրոսյան տրիո» խումբը (Արսեն Պետրոսյան՝ դուդուկ, Աստղիկ Սնեցունց՝ քանոն, Սեսար Վեաս՝ բաս դուդուկ) հունվարին հրավիրվել էր մասնակցելու Չիլիում եւ Կոլումբիայում կայացած համաշխարհային երաժշտության մեծ փառատոնին: Տրիոն յոթ համերգներով հանդես է եկել այնպիսի կարեւոր թատրոններում, ինչպիսիք են Սանտյագոյի «GAM»-ը եւ Բոգոտայի Անդերի համալսարանի դահլիճը: Յուրաքանչյուր համերգին ներկա է եղել մոտ 400-500 հոգի: Սա Հայաստանի հոգեւոր եւ ավանդական երաժշտությունը տարածելու եզակի դեպք է այնպիսի հեռավոր վայրերում, ինչպիսիք են Սանտյագոն եւ Չիլիի Պուկոն քաղաքը, որտեղ շատերն առաջին անգամ լսեցին դուդուկ եւ հայ մշակույթի մասին առհասարակ: Եվրոպա վերադառնալուն պես «Արսեն Պետրոսյան տրիոն» համերգով հանդես է եկել Մադրիդի Կոմպլուտենսե համալսարանում՝ հայագիտության ամբիոնի համար: Ըստ տրիոյի անդամ, չիլիացի Սեսար Վեասի՝ «Յուրաքանչյուր համերգին հանդիսատեսի ընդունելությունը շատ ջերմ էր, հարգալից եւ հույզերով լի, իրենց խոսքերով՝ հոգին հուզող երաժշտության հանդեպ: Սա կարեւոր առիթ է, որը Հայաստանը մերձեցնում է Լատինական Ամերիկային՝ ստեղծելու համար մշակութային փոխանակման նոր կապեր»:
Ա. Բ.
