Վերջերս Ղազախստանի մայրաքաղաք Աստանայում տեղի ունեցավ գրքի միջազգային Եվրասիական ցուցահանդեսը: Այն ներկայացուցչական էր: Մասնակցում էին Ղազախստանի, Ուզբեկստանի, Տաջիկստանի, Ղրղզստանի, ինչպես նաեւ մերձավոր եւ հեռավոր այլ երկրների կրթական ու գիտական կազմակերպությունների, գիտության եւ կրթության ոլորտում ապրանքներ ու ծառայություններ արտադրողների ներկայացուցիչներ, ինչպես նաեւ մասնագիտացված լրատվամիջոցները:
Հաշվի առնելով անվանի գիտնական, Հայկական էներգետիկական ակադեմիայի հիմնադիր նախագահ, բազմաթիվ ակադեմիաների իսկական անդամ, Ռուսաստանի բնագիտության ակադեմիայի պրոֆեսոր, «Ազգ» թերթի թղթակից Ստեփան Պապիկյանի գիտական աշխատանքների կարեւորությունը գիտության եւ կրթության զարգացման գործում՝ ցուցահանդեսի նախագահության որոշմամբ նրա աշխատանքները ներկայացվել են ցուցահանդեսի ծանոթագրված կատալոգում (Եվրասիական գրքի տոնավաճառ-2023 կատալոգի հատուկ հրատարակություն):
Հարկ է նշել,որ Ս.Պապիկյանը հեղինակ է շուրջ 300 գիտական աշխատությունների եւ բազմաթիվ մենագրությունների: Նրա գիտական աշխատանքները դեռեւս Խորհրդային Միության տարիներին ներդրվել են Մոսկվայի էներգահամակարգում եւ բազմաթիվ կազմակերպություններում: Նա համաշխարհային ճանաչման արժանացած վաստակաշատ գիտնական է:
2009թ. գիտամանկավարժական բազմամյա եւ բեղմնավոր գործունեության համար Ստ. Պապիկյանը ստացել է Ռուսաստանի բնագիտության ակադեմիայի պրոֆեսորի գիտական կոչում: Հաշվի առնելով նրա հսկայական ծառայությունները էներգետիկայի զարգացման եւ կրթության բնագավառում՝ նրան շնորհվել է Վերնադսկու անվան ոսկե մեդալ (Մոսկվա), իսկ 2010թ.` «Գիտության եւ կրթության վաստակավոր աշխատող» պատվավոր կոչում (Մոսկվա):
2019 թվականի հուլիսի 17-23-ը Հոնկոնգում (Չինաստան),այնուհետեւ Մոսկվայում, Եվրոպական մի շարք այլ երկրներում (Անգլիա, Գերմանիա եւ այլն) տեղի ունեցած գրքի միջազգային հեղինակավոր ցուցահանդեսներում Ստ. Պապիկյանի գիտական աշխատանքները մեծ հետաքրքրություն են ներկայացրել եւ լայն արձագանք գտել: Նա ՀՀ ԳԱԱ կողմից գիտամանկավարժական բազմամյա եւ բեղմնավոր գործունեության համար պարգեւատրվել է պատվոգրով: Նրա գրչին է պատկանում նաեւ Հայաստանի եւ Արցախի էներգետիկայի պատմության քառհատոր գիտական մենագրությունը: 2017թ. Արցախի էներգետիկայի զարգացման գործում ունեցած ծանրակշիռ վաստակի համար պարգեւատրվել է ԱՀ-ի պետական պարգեւով` «Երախտագիտություն» մեդալով:
