Վերջին շրջանում ռուսական որոշ լրատվամիջոցներ, մեկ-մեկ նույնիսկ խրոխտ վերնագրերի ներքո ներկայացնելով ինքնաթիռի կործանման առիթով Ադրբեջանի հոխորտացող նախագահի պահանջներին Կրեմլի խոսնակների հեզ ու զգուշավոր պատասխանները, միաժամանակ առիթը բաց չեն թողնում քար գցելու կարծես թե «հեռանալ» հավակնող Հայաստանի կողմը: Դա երբեմն անելով, մեղմ ասած, նաեւ անբարեխիղճ, էժան լրատվական «հնարքներով»:
Ահա վերնագիր սովորաբար հավասարակշիռ «Ռամբլեր» տեղեկատվական հանգույցի հունվարի 13-ի լրահոսում. «Հայաստանում հայտարարություն են արել ԵԱՏՄ-ից երկրի դուրս գալու մասին»… Առաջինը, որ ընթերցողը կարող է հասկանալ միայն սա կարդալուց, այն է, թե Հայաստանը մտադրություն է հայտնել կամ հենց դուրս է գալիս այդ կառույցից: Սխալմա՞մբ, թե՞ հատուկ նպատակով է սույն թյուրիմացությունը տարածվել, երբ իրականում լուրը ճիշտ հակառակի մասին է: Երբ «Ինտերֆաքս» ռուսականից արտատպված այս հաղորդումը բացում ես լրիվ կարդալու համար, նոր միայն վերնագիր է դրված «Հայաստանում պատմել են՝ երկիրը ծրագրո՞ւմ է արդյոք դուրս գալ ԵԱՏՄ-ից»: Իսկ լրատվության նշված բնագիր աղբյուրում այն հստակ վերնագրված է «Երեւանում հայտարարել են, որ Հայաստանը չի նախատեսում դուրս գալ ԵԱՏՄ-ից»…
Սանկտպետերբուրգյան «ԱԲՆ24» (abnews.ru) ցանցային հրատարակությունը դեկտեմբերի 30-ին, հղում անելով չինական «Սոհու» պարբերականին, վերջինիս անունով տեղեկատվություն է հրապարակել «Ռուսաստանին խաբել է կարեւոր դաշնակիցը…» վերնագրով, որպես այդպիսի դաշնակից նշելով մեր երկիրը: «Հայաստանը դավաճանեց Ռուսաստանին»,- ըստ «ԱԲՆ24»-ի՝ գրել են չինացի հեղինակները: «Դավաճանելն» էլ, ըստ հրապարակման, եղել է ժամանակին վարչապետ Նիկոլ Փաշինյանի այն հայտարարությունը, թե երկիրը ամենամոտ ժամկետում կարող է դուրս գալ ՀԱՊԿ-ից: Չգիտենք՝ իրողությունը ծուռ հայելում ներկայացնող (մանավանդ՝ թե ով է ում դավաճանել) այս պնդումն իրոք որքանով եւ երբ են արել չինացի լրագրողները,- այդ պարբերականի ռեսուրսում նման նյութ գտնել համենայն դեպս մեզ չհաջողվեց,- բայց ինչպես պարզեցինք, բացառապես նույն հրապարակումը ռուսական այս լրատվամիջոցն արել է դեռ անցած ամռանը՝ հունիսի 13-ին (ՌԴ որոշ ԶԼՄ-ներ էլ կրկնել են այն)… Նույն հին «մեռելը» վեց ու կես ամիս հետո, տարեմուտի՜ն, Պուտին-Փաշինյան հանդիպման-չհանդիպման խոսակցությունների օրերին հատուկ վերակենդանացնելը (տխուր բառ չասենք), թվում է, էժան, ցած «հնարք» է ընդդեմ Հայաստանի: Սա՞ է իրենց լրագրողական էթիկայի, տեղեկատվական մշակույթի ու մասնագիտական բարեխղճության մակարդակը:
Այնուամենայնիվ մեկ ռուսական լրատվամիջոց՝ «Բլոկնոտ.ռու»-ն, ի պատասխան Ռուսաստանից ներողություն պահանջող Ալիեւի՝ համարձակ հոդված է տպագրել միայն անցյալ տարվա ընթացքում հենց Ռուսաստանում ռուսների նկատմամբ ադրբեջանցիների ագրեսիվ հանցագործությունների մեծաթիվ դեպքերի մասին:
Բայց այստեղ կցանկանայինք ՀՀ իշխանությունների եւ պատկան տարբեր կառույցների ուշադրությունը հրավիրել սույն լրատվամիջոցի Հայաստանին վերաբերող բաժնի վրա, որի էջերում տեսանք հրապարակումների ուղղակի թշնամական չարագուշակ ու վայրահաչ վերնագրեր մեր երկրի, նրա ապագայի մասին:
ԳԵՂԱՄ ՄԿՐՏՉՅԱՆ
Լուսանկարը՝ ՌԻԱ Նովոստի–ի
