Հայաստանը հետաքրքրված է իրանական անօդաչու թռչող սարքերով

Մամուլից տեղեկանում ենք Իրանի Քաշան քաղաքում օգոստոսի 15-ին մեկնարկած    ռազմական ԱԹՍ-երի  յոթերորդ միջազգային մրցաշարի մասին, որին, Ռուսաստանից ու Բելառուսից  բացի,  մասնակցում է նաեւ Հայաստանը:  Նշված է նաեւ, որ միջազգային միջոցառման փակման արարողությունը տեղի կունենա օգոստոսի 28-ին:

Իսլամական հեղափոխության պահապանների կորպուսի օդատիեզերական ուժերի հրամանատար  Ալի Բալալիի խոսքով՝ «2022 բազեի որս» ռազմական  անօդաչու թռչող սարքերի յոթերորդ միջազգային մրցումների նպատակը մարտունակության մակարդակի բարձրացումն է, ինչպես նաեւ Իրանի բարեկամ  երկրներին այդ բնագավառում ռազմական փորձի եւ ձեռքբերումների փոխանցումը:  Նշենք, որ այս միջազգային մրցաշարն անցկացվում  է 2015 թվականից:

Նույն աղբյուրի համաձայն, միջոցառմանը մասնակցում են վերոգրյալ  երկրներից Իրան ժամանած 70 զինվորականներ: Մրցաշարն  ընթանում է  «խաղաղության եւ բարեկամության ուղերձով՝  միջազգային ահաբեկչության եւ աշխարհն ապակայունացնող գործոնների դեմ համատեղ պայքարում  Իրանի  համագործակցությունն այլ երկրների հետ» խորագրի ներքո:

Սակայն Իրանում ընթացող անցուդարձերին ուշի-ուշով հետեւող Թել Ավիվն  այլ կարծիքի է Քաշան քաղաքում անցկացվող միջոցառման մասին, պնդելով, որ    արբանյակային լուսանկարները արձանագրել  են  Իրանի աջակցությունը վայելող այլ երկրներից  Քաշան ժամանած աշխարհազորայինների անցկացրած վարժանքների փաստը: Իսրայելի պաշտպանության նախարար Բենի Հանցը տարածաշրջանային դաշնակիցների աջակցությամբ ԱԹՍ-եր արտադրելու եւ օգտագործելու կապակցությամբ հանդես է եկել   Իրանին դատապարտող հայտարարությամբ:   

Այդ միջոցառումը չի վրիպել նաեւ Վաշինգտոնի տեսադաշտից, մրցաշարը  համարելով Ռուսաստանի կողմից գնված իրանական արտադրության  ԱԹՍ-երի օգտագործման նպատակով անցկացվող վարժանք:

ԱՄՆ իշխանությունները ենթադրում են, որ Իրանը ծրագրում է Ռուսաստանին փոխանցել մի քանի հարյուր անօդաչու թռչող սարք, այդ թվում՝ զենք տեղափոխող ԱԹՍ-ներ: Նման կարծիք է հայտնել ԱՄՆ նախագահի՝ ազգային անվտանգության հարցերով օգնական Ջեյք Սալիվանը:

Նրա խոսքով՝ Իրանը նաեւ նախատեսում է ռուսական ուժերին փոխանցել  այդ անօդաչու սարքերի օգտագործման փորձը, որը կարող էր լինել հենց Քաշան քաղաքում անցկացվող ռազմական ԱԹՍ-երի  յոթերորդ միջազգային մրցաշարը:  

Ավելի վաղ Ջեյք Սալիվանը հայտնել էր մարտական անօդաչու թռչող սարքերի զննության համար ռուս ներկայացուցիչների Իրան այցի մասին: Ինչպես գրում է «ԿՈՄԵՐՍԱՆՏ»-ը, Սալիվանը հայտարարել է, որ վերջերս  ռուս պաշտոնատար անձինք առնվազն երկու անգամ այցելել են Իրանի կենտրոնական մասի օդանավակայան՝ մարտական անօդաչուների աշխատանքին ծանոթանալու  նպատակով: 

Միաժամանակ իրանական զանգվածային լրատվամիջոցները տեղեկացնում են, որ  օգոստոսի 24-ին Իրանում մեկնարկել է բանակի ԱԹՍ-երի երկօրյա համատեղ  զորավարժություն, որին ներգրավված են ավելի քան 150 անօդաչու թռչող սարքեր: Ըստ պաշտոնական հաղորդագրությունների, զորավարժությունը ներառում է Իրանի հարավում Պարսից ծոցից  ու  Օմանի ծովից մինչեւ երկրի արեւելյան, արեւմտյան եւ կենտորնական շրջանները:

Անշուշտ, Հայաստանը պետք է մտածի  իր պաշտպանական ներուժի վերականգնման մասին, եւ «Խաղաղության ուղերձով» կազմակերպվող հարեւան երկրի միջոցառումներին մասնակցելը խրախուսելի է:

Այս օրերին վճռվում է Իրան-ԱՄՆ հարաբերությունների հետագա ընթացքը պայմանավորող  կարեւորագույն խնդիրներից մեկը, եւ առավել քան երբեւէ նշմարելի է դառնում Իրանի միջուկային ծրագրի առնչությամբ ընթացող բանակցությունների հանգուցալուծումը, որը կարող է հնարավորություն տալ  ավելի անկաշկանդ  պայմաններում  համագործակցել պատժամիջոցների ծանր բեռը թոթափելու  շանսեր ունեցող Իրանի հետ: 

ԳՐԻԳՈՐ ԱՌԱՔԵԼՅԱՆ

Իրանում ՀՀ նախկին դեսպան