Կարեւորագույն բուհերը պետք է մնան քաղաքի կենտրոնում՝ իրենց պատմական շենքերում

Չգիտեմ անգրագիտության արդյունք է, դիտավորության, թե՞ լավագույն ավանդույթներ ունեցող կրթական օջախները վերացնելու ծրագրված քաղաքականության, բայց այն, որ բոլոր բուհերը որոշել են միավորել մեկ ակադեմիական քաղաքում, դա առնվազն ցնդաբանություն է: Դա ոչ միայն նշանակում է քաղաքային կյանքը վերացնել երիտասարդությունից, այլեւ՝ պատմական արմատներից:

Բերեմ Չեխիայի օրինակը: Պրահայի կենտրոնի գրեթե բոլոր պատմական շենքերը տրված են Կարլի համալսարանին եւ տարբեր ֆակուլտետներին, կինոյի ու թատրոնի ակադեմիային, Գիտությունների ակադեմիային, երաժշտական եւ արվեստների ինստիտուտներին, կոնսերվատորիային, որն ի դեպ գտնվում է Ֆիլհարմոնիայի հարեւանությամբ: Այս ամենն այսպես է, ոչ միայն որպեսզի երիտասարդությունն ավելի մոտ լինի մասնագիտական կառույցներին՝ թատրոններին, կինոսրահներին, համերգասրահներին, այլեւ այն պարզ պատճառով, որ քաղաքի բոլոր ծայրերից հարմարավետ է կենտրոն գալը: Այս քաղաքականությունը պատահական չէ, քանի որ այսպիսով պատմական կենտրոնը նաեւ մշտապես գտնվում է պետության ուշադրության կենտրոնում եւ որեւէ մասնավոր անձ կամ ընկերություն այդ շենքերը չի կարող քանդել կամ վերածել կազինոյի, հյուրանոցի կամ ռեստորանի:

Ընդ որում, առնվազն հինգից վեց բուհ պետք մնան իրենց պատմական շենքերում եւ իրենց ներկա կարգավիճակով՝ Երեւանի պետական համալսարանը, Երեւանի բժշկական համալսարանը, Կոմիտասի անվան կոնսերվատորիան, գեղարվեստի, կինոյի ու թատրոնի ինստիտուտները եւ մանկավարժական համալսարանը: Պրահայի բուն կենտրոնից ոչ այնքան հեռու են միայն Բարձրագույն տնտեսագիտական համալսարանն ու տեխնիկական համալսարանը, բայց երկուսն էլ մոտ են մետրոյի կայարաններին ու տրամվայների կանգառներին: Այսպես կոչված ակադեմիական փոքրիկ քաղաքի պատկերը կարելի է տեսնել Տեխնիկական համալսարանի տարբեր մասնաշենքերի մի թաղամասում լինելու առկայությամբ, որտեղ գտնվում է նաեւ ամենամեծ տեխնիկական գրադարանն՝ իր բոլոր հարմարություններով:

25 տարի է բնակվում եմ Հայաստանից դուրս եւ այս տարիներին շփվել եմ հաջողության հասած հայ բազմաթիվ երաժիշտների հետ, որոնք մշտապես շեշտել են, որ իրենց մասնագիտական հիմնական դասերը ստացել են Երեւանի կոնսերվատորիայում, որն այնպիսի հիմք է ապահովել նրանց համար, որ եվրոպացի հայտնի երաժիշտները զարմացել են: Նույնը վերաբերում է Երեւանի բժշկական համալսարանի շրջանավարտներին, ֆիզիկայի ու բնական գիտությունների, օտար լեզուների մասնագետներին:

Մի՛ խաթարեք արդեն տասնամյակներ շարունակ գործող լավագույն ավանդույթները: Կարող եք զարգացնել, կատարելագործել, վատ բարքերից ազատվել, բայց ոչ արմատահան անել: Ուշքի եկեք:

ՀԱԿՈԲ ԱՍԱՏՐՅԱՆ

Պրահա