Լույս է տեսել «Սոցիալ-տնտեսական զարգացման հիմնախնդիրներ. որոնումներ, հեռանկարներ, լուծումներ» վերնագրով գիտական հոդվածների ժողովածուի հերթական տասներորդ հոբելյանական համարը 448 էջ ծավալով: Ժողովածուն երաշխավորվել է տպագրության Գ.Վ. Պլեխանովի անվան Ռուսաստանի տնտեսագիտական համալսարանի Երեւանի մասնաճյուղի գիտական խորհրդի որոշմամբ:
Ժողովածուն ընդգրկում է տնտեսագիտության տարբեր հարցերին առնչվող հետազոտությունների արդյունքներ: «ՀՀ արտաքին առեւտրի դիվերսիֆիկացման հիմնական խնդիրները»; «Տնտեսական ճգնաժամերի ազդեցությունը ՀՀ արտաքին առտրի վրա», «Պարենային անվտանգության ապահովումը գյուղատնտեսության զարգացման համատեքստում», «Գինու տուրիզմի զարգացման հեռանկարները Հայաստանում», «Ֆինանսական գրագիտությունը որպես ներդրումների գրավչության բանալի» եւ այլ հոդվածներում հեղինակներերը բարձրացնում են մեր երկրի տնտեսության զարգացման բազմաթիվ հարցեր: Տողերիս հեղինակի հոդվածը նվիրված է «Արեւային էլեկտրակայանների տնտեսական արդյունավետության գնահատմանը Հայաստանի տարբեր կլիմայական պայմաններում» թեմային:
Ժողովածուում բարձրացված հարցերն ունեն գիտական բարձր մակարդակ եւ անտարակույս կարող են նպաստել մեր տնտեսության հետագա զարգացմանը: Այն օգտակար կլինի տնտեսագետների, տեսագործնական հետազոտությամբ զբաղվողների, ինչպես նաեւ համակարգում աշխատողների համար:
ՍՏԵՓԱՆ ՊԱՊԻԿՅԱՆ
