Իրանում խաղաղ նպատակներով միջուկային ծրագրի զարգացմանը մասնակցելու երաշխիքներ Մոսկվայի համար

Մոսկվան մտահոգ է, որ Ուկրաինայում ռազմական գործողությունների հետեւանքով Ռուսաստանին ուղղված Արեւմուտքի պատժամիջոցները կխոչընդոտեն  Իրանի միջուկային ծրագրի շուրջ Վիեննայում ընթացող բանակցությունների արդյունքում ձեռք բերված պայմանավորվածություններին:

Այդ իսկ պատճառով, Արեւմուտքի կողմից Ռուսաստանի դեմ կիրառվող պատժամիջոցների հետեւանքով Իրանի հետ համագործակցությանը բացասաբար չանդրադառնալու  խնդրում, Մոսկվան  Վաշինգտոնից գրավոր երաշխիքներ է պահանջել:

Բնականաբար, ինքնիշխան Ուկրաինայում  «հատուկ գործողությունների» անվան տակ միջազգային նորմերի խախտումով պատերազմ հրահրած երկրի կողմից  գրավոր երաշխիք պահանջելը, մեղմ ասած՝ անհասկանալի է թվում:

Այդուհանդերձ, մարտի 5-ին, մամուլի ներկայացուցիչների հետ հանդիպման ժամանակ, ՌԴ ԱԳ նախարար Լավրովը նշել է. «Ռուսաստանին անհրաժեշտ են երաշխիքներ առ այն, որ տվյալ պատժամիջոցները Համատեղ գործողությունների համապարփակ ծրագրով (ՀԳՀԾ) նախատեսված առեւտրատնտեսական ու ներդրումային ռեժիմի վրա բացասաբար չեն անդրադառնա»: Լավրովը նաեւ զգուշացրել է, որ Ռուսաստանին ուղղված Արեւմուտքի  պատժամիջոցների պատճառով ՀԳՀԾ-ի բանակցային գործընթացին հասցված խնդիրները չպետք է բացասաբար անդրադառնան Ռուսաստանի ազգային շահերի վրա: Սակայն ՌԴ արտաքին գործերի նախարարը չի հստակեցրել, թե իր պատկան երկրի ձեռնարկած «հատուկ գործողություների» ժամանակ, արդյո՞ք հաշվի են առնվում  այլ երկրների ազգային շահերը:

Նշենք, որ ՀԳՀԾ-ի շրջանակներում ձեռք բերված պայմանավոր-վածությունների համաձայն, Ռուսաստանին ու Չինաստանին պիտի արտոնվեր  մասնակցելու Իրանի խաղաղ նպատակներով միջուկային ծրագրի զարգացմանը: Սակայն, միջուկային զենք կիրառելու սպառնալիքով հանդես եկող Ռուսաստանին կարտոնվի՞ արդյոք զբաղվել Իրանում խախաղ նպատակներ հետապնդող միջուկային ծրագրի զարգացման գործով:

ՀԳՀԾ-ին վերաբերող Սերգեյ Լավրովի հայտարարությունը ժամանակային առումով համընկավ ատոմային էներգիայի միջազգային գործակալության՝ ՄԱԳԱՏԷ-ի ղեկավար Ռաֆայել Գրոսսիի Թեհրան այցելությանը, ինչը գնահատվեց որպես Վիեննայում տեղի ունեցող  բանակցությունների դրական ընթացքի մասին վկայող քայլ:

Սակայն, ակնհայտ է, որ Ռուսաստանի հրահրած ներկայիս ճգնաժամային պայմաններում ՀԳՀԾ-ի շուրջ  բանակցություններից լավատեսական գնահատականներ ակնկալելը, պատկերավոր ասած, ժամանակավրեպ է:

ԳՐԻԳՈՐ ԱՌԱՔԵԼՅԱՆ