Բնական է, որ գերմանական ԶԼՄ-ներն գերզգայուն են հետեւում Իտալիայի քաղաքական արդի իրադարձություններին։ Երեկ հայտնի դարձավ, որ Սենատի նախագահ է ընտրվել 75-ամյա աջակողմյան Իգնացիո Լա Ռուսսան։ Նրա հանդեպ գերմանացիների բացասական վերաբերմունքն արդեն ձեւավորվել էր, երբ քաղաքական գործիչն իր տանը հպարտությամբ էր ցույց տվել Մուսսոլինիի արձանը, իսկ համավարակի ժամանակ զարմանք պատճառել, որ ձեռքով բարեւելու փոխարեն ունի իր առաջարկը՝ «հռոմեական ողջույնը»՝ Saluto romano-ն։ Ուսագլխից թեւն ուղիղ պարզած, ձիգ այս նշանը տեսել ենք հին ֆիլմերում, իսկ 2-րդ աշխարհամարտից հետո՝ ֆաշիզմի մասին ֆիլմերում։ Եւ, ավաղ, տեսնելու ենք հիմա։ Իտալիայում նախագահի պաշտոնից հետո երկրորդ բարձրաստիճան պաշտոնը ստանձնած Լա Ռուսսան հարում է ծայրահեղ աջ Fratelli d՚Italia կուսակցությանը։ Նույն կուսակցության ներկայացուցիչ Ջիորջիա Մելոնին մի քանի օրից կստանձնի Իտալիայի վարչապետի պաշտոնը։ Այս երկրում մեզ առավել հետաքրքրող դրվագներին դեռ կանդրադառնանք։
ԱՆԱՀԻՏ ՀՈՎՍԵՓՅԱՆ
Գերմանիա
