Բագարան գյուղի առօրյան
Այցելությունս ՀՀ Արմավիրի մարզի Բագարան գյուղ պատահական չէր: Գյուղի դպրոցում սովորում են մոտ 100 աշակերտ: Դպրոցի շենքը երկհարկանի է եւ ժառանգություն է մնացել խորհրդային ժամանակներից: Դպրոցը կենտրոնական ջեռուցում չունի: Աշակերտները լավ են սովորում: Նրանց հայրենասիրական ոգին շատ բարձր է: Դպրոցում գործում է նաեւ թանգարան, որտեղ ցուցադրվում են հիմնականում գյուղում դարեր շարունակ օգտագործված հնամենի իրեր` կճուճներ, լամպեր, թել մանելու սարքեր, թոնիր եւ նրա համար անհրաժեշտ պարագաներ, լուսանկարներ: Ուրախալին այն է,որ թանգարանի մասին հանգամանալի ներկայացրեցին դպրոցի բարձր դասարանի աշակերտները: Ցանկալի կլիներ, որ մյուս դպրոցները նույնպես ունենային իրենց թանգարանները:
Անհրաժեշտ է նշել, որ Բագարան գյուղը գտնվում է ՀՀ Արմավիրի մարզում: Բնակավայրը գտնվում է մարզկենտրոնից 39 կմ հարավ-արեւմուտք, Ախուրյանի գետաբերանի մոտ, ծովի մակերեւույթից 990 մ բարձրության վրա: Բնակչությունը 2011թ. դրությամբ կազմում է 622 մարդ: Սահմանամերձ գյուղ է:
«Մենք ուրախ ենք, որ ստացանք մեծ քանակությամբ գրքեր: Շնորհակալ ենք, որ մեր սահմանամերձ գյուղին ցանկանում եք օգնել գրքերով, որովհետեւ մեր երեխաները շատ ընթերցասեր են: Դասերից հետո կկազմակերպենք քննարկումներ: Գրադարանի առկայության պարագայում նրանից կօգտվեն ոչ միայն երեխաները, այլ նաեւ համայնքի բնակչությունը»,- զրույցի ընթացքում ասաց դպրոցի տնօրեն Գ. Ավետիսյանը:
«Դպրոցի երեխաները ցանկանում էին կահավորել ընթերցասրահ: Առաջին գրքերը դուք բերեցիք: Այն կնպաստի համայնքի զարգացմանը»,- ասաց դպրոցի հայոց լեզվի եւ գրականության ուցուցչուհի Արմինե Ավոյանը:
Առաջիկայում սպասվում է դպրոցի վերանորգում: Գյուղը գազիֆիկացված չէ,հետեւաբար դպրոցի ջեռուցման հարցի արդյունավետ լուծման տարբերակ կարող է հանդիսանալ արեւային վահանակների տեղադրումը: Առնվազն 100 ԿՎտ հզորությամբ արեւային կայան ունենալու դեպքում տարեկան կարող է արտադրվել մոտ 150 հազար ԿՎտժ էլեկտրական էներգիա: Ցանկալի կլիներ նաեւ դպրոցի տանիքին տեղադրել արեւային ջրատաքացուցիչ տաք ջուր ունենալու համար: Հարկ է նշել,որ գյուղի մի շարք բնակելի տների տանիքներին կարելի էր տեսնել արեւային ջրատաքացուցիչներ: Համայնքի էներգետիկ անվտանգության տեսակետից անչափ կարեւոր հարց է եւ պետք լուրջ ուշադրության առարկա դառնա:
Մնում է հուսալ, որ կգտնվեն բարեգործական կազմակերպություններ եւ գործարարներ,որոնք կցանկանան օգնել դպրոցին, ինչու չէ՝ նաեւ գյուղին՝ ցանկալի նպատակին հասնելու համար:
Հարկ է նշել,որ միջոցառման կազմակերպման հեղինակը Էջմիածին քաղաքի բնակիչ, ինժեներ Վլադիկ Մուսոյանն էր:
ՍՏԵՓԱՆ ՊԱՊԻԿՅԱՆ
Հայկական էներգետիկական ակադեմիայի հիմնադիր նախագահ,Ռուսաստանի բնագիտության ակադեմիայի պրոֆեսոր
