Իմաստաբանական բառարան

Ծիծաղում են նաեւ մարդիկ

Ծիծաղը, ըստ դրա մասնագետների,  ուրախություն արտահայտելու ժամանակ երբեմն  արտաշնչական շարժումների ուղեկցությամբ հայտնվում է դեմքի վրա:

Բայց պետք չէ հավատալ ծիծաղագետների այն պնդումներին, որ ծիծաղը միայն մարդկային, ու երբեմն էլ կապկային որակ է: Սուտ է:

Կար ժամանակ, երբ ծիծաղելու տրամադրություն  ուներ նաեւ ԱՐՑԱԽԻ ԱՐԵՎԸ, որի փաստն է վավերագրել Ռոլանդ Շառոյանը՝ «ԱՐԵՎԸ ԾԻԾԱՂՈՒՄ Է ԱՐՑԱԽՈՒՄ» վերտառությամբ կինոսցենարի մեջ:

Մի՛ հավատացեք, որ ծիծաղում են միայն մարդիկ ու կապիկները: Սյունյաց աշխարհի անտառներում սուլացող քամու ծիծաղից ներշնչված Համո Սահյանն էլ է անտառային երբեմնի խրախճանքի աղմուկը մեզ հասցնելու փորձ արել.

Խշշում էր անտառն ու տարուբերվում,

Երկինք էր հասնում խշշոցը նրա…

Իսկ քամին ուրախ սուլում էր հեռվում

Եվ ծիծաղում էր անտառի վրա…

 Մեծն Թումանյանն էլ  է վկայում, որ մի ժամանակ ծիծաղում  էր նաեւ ԾԻԾԱՂԱԽԻՏ Վանա  ծովը, երբ դրա առափնյա  փոքրիկ  գյուղից իր սիրելիին հասնելու համար ծովն էր նետվում սիրահար տղան:

Ոչ, սուտ է, որ ծիծաղում են միայն մարդիկ ու կապիկները: Հենց Սեւակն է արձանագրել  տարերքի  ծիծաղն ու ԱՆԼՌԵԼԻ ԶԱՆԳԱԿԱՏԱՆ միջոցով փոխանցել ծիծաղկոտ լեռնային վտակի ու կապույտ երկնքի ղողանջը.

Բառե՛րը… եղո՜ւկ: Իսկ ձա՜յնը… զուլա՛լ.

Այդպես լեռնային վտակն է կարող

Քարերի վրա ծիծաղել ու լալ…

Թվաց՝ ամպերն են բացխուփիկ խաղում,

Թվաց՝ երկինքն է կապույտ ծիծաղում,

Իսկ գարնանամուտին ու անտառի զվարթ ծիծաղին նվիրված Վահան Տերյանի ավետումն ասես ծիծաղի սահմանափակ մենաշնորհի պնդումները հերքելու համար է հորինված եղել. 

Քնքշաբույր ծաղկանց հրեղեն խաղով

Ժպտում են նորից անտառ ու ձորակ,

Եվ հեղեղները խոսուն-սառնորակ

Ողջունում են ինձ զվարթ ծիծաղով:

Ոչ, մի՛ հավատացեք, որ ծիծաղը միայն մարդու եւ կապկի մենաշնորհն է: Հավն էլ է ծիծաղում, այն էլ՝ եփած հավը, երբ անհավանական ու ծիծաղելի ստեր է լսում:

Մի՛ հավատացեք ստերին…