Հայաստանի իշխանությունները շրջանառության մեջ են դրել զենքի շրջանառության կարգավորման մասին ՀՀ նոր օրենքի նախագիծը, ըստ որի քաղաքացիական զենք ձեռք բերելու թույլտվության տարիք կսահմանվի 21 տարեկանը, բացի այդ՝ այսուհետեւ պարտադիր չէ, որ անձը զենք ձեռք բերելու համար որսորդ միության անդամ լինի:
Չեղարկվում է նաեւ փամփուշտների քանակի ձեռք բերման սահմանափակումը:
Այս թեմայի շուրջ զրուցեցինք քաղաքացիների հետ եւ հետաքրքրվեցինք, թե ինչ կարծիք ունեն օրենքի այս նոր նախագծի մասին:
«Եթե նորմալ մարդիկ ստանան զենք, ոչ մի վտանգ չի լինի»:
«Իմ կարծիքով պետք է մարդու հոգեվիճակը ստուգեն, ապա նոր զենք տրամադրեն»:
«Ես շատ վատ եմ վերաբերվում այդ հարցին, քանի որ այսօրվա երիտասարդության համար ահավոր իրավիճակ կառաջանա»:
«Կարծում եմ 21 տարեկանը արդեն բավականին հասուն տարիք է զենք ունենալու համար»:
«Քանի որ մենք պատերազմական դրության մեջ ենք, բոլորս էլ պետք է զենք ունենանք»:
«Կարծում եմ միայն սահմանամերձ վայրերում է դա կարեւոր»:
Ահա այսպիսի իրար հակասող պատասխաններ տվեցին մեր քաղաքացիները: Եվ իրոք որ պետք է սառը գլխով դատել, քանի որ օրեցօր աճում է հանցագործությունների թիվը, իսկ այս օրենքից հետո կարող է առաջանալ քաոսային իրավիճակ:
Սահմանամերձ գյուղերում անհրաժեշտություն կա զենքի, քանի որ վտանգը այնտեղ անմիջական է, իսկ ինքնապաշտպանման միջոցները՝ քիչ: Եվ վերհիշենք 2021 թվականի նոյեմբեր ամիսը, երբ Սյունիքի մարզպետարանը որոշում կայացրեց Արավուզ գյուղում բնակիչների զենքերը հավաքել, որտեղ գրեթե ամեն օր թշնամու կողմից սադրանքներ են կատարվում:
ՕՍԻՊՅԱՆ ԼԱՈՒՐԱ
ՀՊՄՀ լրագրության բաժնի ուսանող
