Հոկտեմբերի 9-ին «Նիկոլայ Նիկողոսյան մշակութային հիմնադրամում» Եղիշե Չարենցի 125-ամյակին նվիրված միջոցառումների շրջանակում տեղի ունեցավ «Գույն ու գիր» ամառային դպրոցի աշակերտների աշխատանքների ցուցահանդեսը:
Այս ամռանը «Նիկոլայ Նիկողոսյան մշակութային հիմնադրամը» եւ Եղիշե Չարենցի տուն-թանգարանը համատեղ իրականացրել էին «Գույն ու գիր» ամառային դպրոցը: Մասնակիցներն ինտերակտիվ կրթական ծրագրերի միջոցով ծանոթացան անիմացիայի հիմունքներին, տեխնիկաներին, մասնակցեցին քանդակի եւ լինոփորագրության վարպետության դասերի: Ցուցադրության ընթացքում ներկայացվեցին երեխաների կատարած փորագրությունները, որոնց հիմք հանդիսացավ Սարյանի վրձնած Չարենցի դիմանկարը, ինչպես նաեւ ցուցադրվեց երեխաների ու նկարիչ Գոհար Սարգսյանի ստեղծած անիմացիոն ֆիլմը, որտեղ երեխաները պլաստիլինրի միջոցով Նիկողոսյանի քանդակներին էմոցիաներ եւ շարժ են տվել:
Դպրոցի աշխատանքը կրում է շարունակական բնույթ: Այն համագործակցում է տարբեր թանգարանների եւ պատկերասրահների հետ, հանդես է գալիս նոր խորագրերով եւ ավարտական ցուցահանդեսներով:
ՀՐԱՉՅԱ ԳԱԼՍՏՅԱՆ
