Նոյեմբերի 23-ին Իսպանիայի Բարսելոնա քաղաքի Սագրադա Ֆամիլիա պատմական տաճարում կայացել է համերգ՝ «Հոգեւոր ճանապարհորդություն հայկական, անգլիկան եւ հռոմեական կաթոլիկ եկեղեցիների սրբազան երգասացությունների միջոցով՝ ի փառս Աստծո եւ աշխարհի խաղաղության» խորագրով:
Այս մասին տեղեկացնում են «Միասին» համահայկական ՀԿ-ից:
Համերգը կյանքի է կոչվել ՀԲԸՄ Բուենոս Այրեսի մասնաճյուղի (նախագահությամբ Անտոնիո Սարաֆյանի), Իսպանիայի բարեփոխված եպիսկոպոսական եկեղեցու եւ կաթոլիկ ծխերի համատեղ ջանքերով:
Արգենտինաբնակ երաժիշտ Գագիկ Գասպարյանը դուդուկի կատարումներով օտարազգի հանդիսատեսին ներկայացրել է Ներսես Շնորհալու, Գրիգոր Նարեկացու, Կոմիտասի, Մխիթար Այրիվանեցու, Մակար Եկմալյանի, Առնո Բաբաջանյանի ստեղծագործությունները: Նվագակցում էր երգեհոնահար Ռոբերտո Ռամիրեզը:
Հնչել է նաեւ եվրոպական հոգեւոր երաժշտություն:
Միջոցառման սկզբում ներկաներին օրհնության խոսք է ասել Արեւմտյան Եվրոպայի Հայրապետական պատվիրակ եւ Սուրբ Աթոռում Հայ Առաքելական Եկեղեցու ներկայացուցիչ Տեր Խաժակ արք. Պարսամյանը:
Սրբազան Հայրն իր գնահատանքն է հայտնել Արգենտինայի եւ Իսպանիայի Հայկական Բարեգործական Ընդհանուր Միության մասնաճյուղերի ղեկավարներին, որոնց նվիրյալ աշխատանքի արդյունքում Սանգրադա Ֆամիլիա նշանավոր տաճարում կազմակերպվել է հայ հոգեւոր երաժշտության հանրահռչակման համերգը, որպեսզի դահլիճում ներկա մարդկանցով միախմբված աղոթք բարձրացվի առ Աստված աշխարհի խաղաղության համար՝ երաժշտության միջոցով:
Բացման խոսքում համերգին հատուկ մասնակցելու համար Բարսելոնա ժամանած ՀԲԸՄ Արգենտինայի մասնաճյուղի ատենապետ Անտոնիո Սարաֆյանն երախտագիտության խոսք է ասել Սանգրադա Ֆամիլիա տաճարի վանահայր եւ տեսուչ Խոսե Մարիա Տուրույին՝ հայկական մշակույթին նվիրված այս բացառիկ համերգը կազմակերպելու գործում գործադրած ջանքերի համար՝ նշելով, որ իրենց դռները բացելով հայկական հոգեւոր երաժշտության առջեւ՝ ցուցաբերում են հարգանք հայ ժողովրդի եւ հայկական մշակույթի հանդեպ:
Համերգին Հայաստանից հրավիրված էր մասնակցելու նաեւ «Միասին» կրթամշակութային, սոցիալական, հոգեւոր-դաստիարակչական համահայկական հասարակական կազմակերպության հիմնադիր-նախագահ Գեւորգ Չիչյանը:
Վերջինս իր խոսքում ընդգծել է, որ «Միասին» ՀԿ-ի նպատակը Հայաստանում բարեգործական, առողջապահական ծրագրեր իրականացնելուց բացի, նաեւ Հայաստան-Սփյուռք կապերի ամրապնդումը, Սփյուռքում հայկական մշակույթի տարածումն ու միջմշակութային երկխոսության ապահովումն է, որի պատեհ առիթով ինքը ներկա է համերգին:
Գեւորգ Չիչյանը իր շնորհակալական խոսքն է հղել ՀԲԸՄ Արգենտինայի մասնաճյուղի ատենապետ Անտոնիո Սարաֆյանին եւ երաժիշտ Գագիկ Գասպարյանին հրավերի համար եւ հանձնել է ՀԿ-ի շնորհակալագրեր մշակութային միջոցառման նախաձեռնողներին՝ կատարած անմնացորդ աշխատանքի համար:
Հավելենք, որ Գագիկ Գասպարյանը, հավատարիմ մնալով հայկական մշակույթը օտարների շրջանում հանրահռչակելու իր առաքելությանը, հայկական բազմադարյա երաժշտությունը այս համերգարշավի ընթացքում հնչեցրել է Իսպանիայի այլ քաղաքներում նույնպես, ինչպես նաեւ Հոլանդիայում:
Երաժշտի ելույթը կազմակերպվել է նաեւ Կ.Պոլսի հայաշատ Ֆերիգյուղի Ս. Վարդանանց եկեղեցում՝ օրհնության Կ.Պոլսի Հայոց Պատրիարք Տեր Սահակ արք. Մաշալյանի եւ Կրետե կղզու Հերակլիոնի Սբ. Կարապետ եկեղեցում, որին ներկա է եղել նաեւ եկեղեցու հոգեւոր տեսուչ Տ. Եզնիկ արք. Պետրոսյանը:
Ընդհանուր առմամբ, նախատեսված է եղել տասնչորս ելույթ:
Գագիկ Գասպարյանի գործունեության առանցքում օտարների շրջանում հայկական մշակույթը տարածելն է: Այդ նպատակով նա բազմաթիվ համերգներ է ունեցել օտարազգի հանդիսատեսի համար տարբեր բեմերում՝ հանրահռչակելով հայ ժողովրդի հարուստ երաժշտարվեստը դուդուկի միջոցով:
Գագիկ Գասպարյանի դուդուկի կատարումները հնչում են նաեւ լատինամերիկյան, կանադական եւ եվրոպական մի շարք ֆիլմերում, հեռուստատեսությամբ: Նրա նախաձեռնությամբ արգենտինական թերթերում հոդվածներ են լույս տեսնում հայկական բազմադարյան մշակույթի մասին:
Գագիկ Գասպարյանն աշխարհի տարբեր երկրներից ունի օտարազգի բազմաթիվ ուսանողներ, որոնց առցանց դասավանդում է դուդուկ, ինչպես նաեւ կազմակերպում է վարպետության դասեր:
Տ. ԵԶՆԻԿ արք. ՊԵՏՐՈՍՅԱՆ
Հոգեւոր տեսուչ
