Այս տարին հոբելյանական է բանաստեղծ, թարգմանիչ, հրապարակագիր, Հայաստանում Սերբիայի պատվավոր հյուպատոս Բաբկեն Սիմոնյանի համար: Լրացավ նրա ծննդյան 70-ամյակը:
Հոկտեմբերին Բաբկեն Սիմոնյանը հրավիրված էր Սերբիա՝ մասնակցելու «Սմեդերեւյան բանաստեղծական աշուն» պոեզիայի ամենամյա միջազգային փառատոնին, որի շրջանակներում «Միջօրեականներ» մատենաշարով լույս է տեսել նրա բանաստեղծությունների «Աղոթք» երկլեզու (հայերեն-սերբերեն) ժողովածուն, որը բարձր գնահատականի է արժանացել գրաքննադատների ու փառատոնի կազմակերպիչների կողմից:
Փառատոնից զատ նա մասնակցել է նաեւ Բելգրադում անցկացվող գրքի ամենամյա միջազգային տոնավաճառին, որտեղ հանդիպումներ է ունեցել հրատարակիչների, գրողների ու թարգմանիչների հետ, համագործակցության պայմանավորվածություն ձեռք բերել: Բելգրադյան ազգային հեռուստաընկերության հրավերով նա երկու հարցազրույց է տվել, խոսել է հայ-սերբական գրական ու մշակութային կապերի, ինչպես նաեւ իր գրական ու թարգմանական գործունեության մասին:
Երեւան վերադառնալով՝ Ավետիք Իսահակյանի անվան Կենտրոնական գրադարանում օրերս տեղի ունեցավ հանդիպում բանաստեղծի հետ: Նա առաջին անգամ չէ, որ հյուրընկալվում գրադարանում: Այստեղ նա բազմիցս կազմակերպել է գրական-մշակութային երեկոներ, գրքերի շնորհանդեսներ, Սերբիայի Հանրապետության պետականությանը նվիրված ցերեկույթներ, մասնակցել գրադարանի կազմակերպած միջոցառումներին: Այս անգամ նա հյուրընկալվել էր գրադարանում իր հոբելյանի առիթով, որի ընթացքում հնչեցին Սիմոնյանի մասին ժամանակակիցների խոսքերը, նրա բանաստեղծությունները, թարգմանությունները սերբերենից հայերեն եւ հայերենից սերբերեն, նաեւ երգեր գրված նրա խոսքերով:
Իր բացման խոսքում գրադարանի տնօրեն, ՀՀ մշակույթի վաստակավոր գործիչ Հասմիկ Կարապետյանը սիրով ու ջերմությամբ խոսեց հոբելյարի մասին, բարձր գնահատեց նրա ազգանվեր առաքելությունը: Սիմոնյանին հասցեագրված տնօրենի ուղերձում ասված է.
«Հարգարժան Բաբկեն Սիմոնյան, Ձեր վաստակը մեծ է, գործը՝ նվիրական…
Դուք այն համեստ ու անխոնջ մշակն եք, որ ամեն մի նոր գրքով մի բուռ բարություն, կամք, հայրենասիրություն, ուժ ու կորով եք հաղորդում ընթերցողին: Կյանքով, եռանդով ու ծրագրերով լի մարդ, որ կարողացել է ստեղծել, ամրապնդել հայ եւ սերբ ժողովուրդների միջեւ բարեկամական, մշակութային կամուրջ՝ քաջածանոթ լինելով մաքառումներով լի նրանց պատմական ճակատագրին:
Երեւանի Ավ. Իսահակյանի անվան Կենտրոնական գրադարանի տնօրենության եւ բազմահազար ընթերցողների անունից շնորհավորում եմ Ձեզ ծննդյան 70-ամյակի առթիվ: Մաղթում եմ Ձեզ հարատեւություն, առողջություն, արեւշատություն եւ ամենայն բարիք»:
Ցերեկույթին ներկա էր Հայաստանում Սերբիայի Հանրապետության արտակարգ եւ լիազոր դեսպան, տիկին Տատյանա Պանայոտովիչ-Ցվետկովիչը: Նա հիացմունքով խոսեց գրողի անցած ստեղծագործական երկարամյա արգասավոր ուղու եւ պատվավոր հյուպատոսի գործունեության մասին՝ բարձր գնահատելով Բաբկեն Սիմոնյանի գրական վաստակը եւ մեծ ավանդը հայ-սերբական հարաբերություններում: Սերբիայի կառավարության, արտաքին գործերի նախարարության, դեսպատան եւ իր անունից անձամբ նա շնորհակալություն հայտնեց հոբելյարին այն ծավալուն գործունեության համար, որն իրականացրել է Բաբկեն Սիմոնյանը անցած 47 տարիների ընթացքում:
Ցերեկույթի ընթացքում բանաստեղծությունների ընթերցումները համեմվում էին սերբական քնարական երգերով, Բաբկեն Սիմոնյանի մասին հայ եւ սերբ անվանի մտավորականների գրառումներով:
Ավանդույթի համաձայն, հոբելյանական ցերեկույթի ավարտին Բաբկեն Սիմոնյանն ընթերցեց Եղիշե Չարենցի «Ես իմ անուշ Հայաստանի» բանաստեղծությունը իր թարգմանությամբ՝ սերբերեն:
ՀԱՍՄԻԿ ԳՐԻԳՈՐՅԱՆ
