Հայաստանի եւ Ադրբեջանի ղեկավարների հայտարարություններից հետո, թե հայերն ու ադրբեջանցիները, հնարավոր է, որեւէ ժամանակ անց ապրեն մեկը մյուսի տարածքում, սկսեցինք՝ հետաքրքրվել՝ քանի՞ մարդ է այս պահին բնակվում Արցախում: «Ազգ»-ին Արցախի նախկին պաշտոնյաները տեղեկացրին, որ այս պահին Արցախում առավելագույնը 10 արցախցի կա: «Նրանց մեծ մասը Ստեփանակերտում են, մեկ-երկու հոգի գուցե շրջաններում մնացած լինի: Այդ տասից էլի մեկ-երկուսն են այլազգի, որ դիմել են ռուս խաղաղապահներին, երաշխիքներ են ստացել, որ ադրբեջանցիներն իրենց ձեռք չեն տա: Մնացածը հայեր են»,- ասաց մեր զրուցակիցն ու հավելեց, որ Հայաստան չեն տեղափոխվել հիմնականում միայնակ, ընտանիք չունեցողները:
Օրեր առաջ սակայն «Ազգ»-ը պարզեց, որ Ստեփանակերտում են մնացել նաեւ նախկին «Շուշի պլազա» հյուրանոցի տնօրեն Սարգիս Գալստյանն ու նրա կինը՝ բժիշկ Մարգարիտա Շահնազարյանը: Գալստյանի՝ Ստեփանակերտը չլքելը նոր բան չէ, ավելին՝ նրա անունը կապվում էր Ստեփանակերտի պարետի պաշտոնի հետ, ինչը սակայն հետագայում հերքվեց: Նման հերքմամբ օրեր առաջ նաեւ Գալստյանի կինն է հանդես եկել, ավելին՝ ընդգծել է, որ «սուտ լուրեր տարածողին դատի չեն տալիս, քանի որ դա միայն իրենք կարող են անել»:
Մարգարիտա Շահնազարյանը վերջին օրերին ակտիվորեն լուսանկարներ ու տեսանյութեր է հրապարակում Ստեփանակերտից: Դրանց վրա լատինատառ գրառումներ է անում ու մուննաթ գալիս իրենց որպիսությունը հարցնողների եւ ընդհուպ՝ լրագրողների վրա: Լուսանկարներից մեկով, օրինակ, շեշտում է, որ «որեւէ մեկի պատվերը չեն կատարում, եւ լուսանկարներ եմ գցում, որ կարոտներդ առնեք»: Մեկ ուրիշով «հետեւություն անում», որ «վերջին «սթորին» ազդել է վաճառված լրագրողների վրա»:
Թե ինչու է երեխաներին Արցախից հանած տիկինն Արցախի հայաթափումից հետո ամիսներ անց որոշել ակտիվորեն լուսանկարներ հրապարակել, լուրջ մտորելու տեղիք է տալիս:
ՍԵՎԱԿ ՎԱՐԴՈՒՄՅԱՆ
